Gjykata e Posaçme kundër Korrupsionit dhe Krimit të Organizuar (GJKKO) ka shpallur fajtorë 13 të pandehur të akuzuar për pjesëmarrje në organizatë terroriste dhe, për disa prej tyre, edhe për pjesëmarrje në veprime luftarake në një shtet të huaj.
Vendimi u dha këtë të enjte, më 11 qershor 2026, pas përfundimit të gjykimit të zhvilluar me procedurë të zakonshme.
Sipas vendimit të trupit gjykues të përbërë nga gjyqtarët Irena Gjoka, Elsa Ulliri dhe Bib Ndreca, Shyqyri Kaca dhe Saimir Kaca u dënuan secili me nga 10 vite burgim pas bashkimit të dënimeve për veprat penale “Pjesëmarrje në organizatë terroriste” dhe “Pjesëmarrja në veprime luftarake në një shtet të huaj”.
Ndërkohë, Enes Kaca u dënua me 5 vite burgim si i mitur, ndërsa Bajram Sulaj, Arbër Stafasani, Etion Zani dhe Erion Luto u dënuan me nga 9 vite burgim. Të pandehurit e tjerë morën dënime që variojnë nga 4 deri në 8 vite burg. Gjykata vendosi që dënimet të vuahen në burgje të sigurisë së lartë dhe ngarkoi SPAK-un me ekzekutimin e vendimit. Kundër këtij vendimi mund të bëhet ankim në Gjykatën e Apelit të Posaçëm brenda 15 ditëve nga njoftimi i vendimit të arsyetuar.
Vendimi vjen pas një hetimi të gjatë të SPAK-ut mbi rrjetin e shqiptarëve që iu bashkuan organizatës terroriste ISIS gjatë viteve të luftës në Siri. Sipas dosjes hetimore, personat e përfshirë u rekrutuan kryesisht përmes kontakteve në ambiente fetare dhe udhëtuan drejt Sirisë për t’iu bashkuar të ashtuquajturit “Shteti Islamik”. Hetimet treguan se burrat angazhoheshin në luftime dhe aktivitete të organizatës, ndërsa gratë dhe fëmijët transferoheshin në zonat e kontrolluara nga ISIS-i, ku jetonin nën administrimin e grupit terrorist dhe përfitonin mbështetje financiare e logjistike prej tij.
Pikërisht për këto akuza, Gjykata e Posaçme kundër Korrupsionit dhe Krimit të Organizuar (GJKKO) ka shpallur fajtorë 13 të pandehur të akuzuar për pjesëmarrje në organizatë terroriste dhe, për disa prej tyre, edhe për pjesëmarrje në veprime luftarake në një shtet të huaj. ©LAPSI.AL
