Penélope Cruz ka treguar një moment tronditës gjatë xhirimeve të projektit të saj më të ri, “The Black Ball”, kur mjekët i njoftuan gabimisht se mund të kishte një aneurizëm në tru.
Gjatë një konference për shtyp në Festivalin e Cannes, aktorja 52-vjeçare rrëfeu se gjithçka ndodhi teksa po përgatitej për xhirime, kur mori një telefonatë urgjente nga mjeku.
“Po bëheshim gati për të dalë në set, po vendosja parukën, dhe më thanë: ‘Duket se ke një aneurizëm në tru’,” kujtoi ajo.
“Pata ndjesinë se po vdisja. Ishte diçka krejtësisht surreale në jetën time,” shtoi aktorja.
Fatmirësisht, pas kontrolleve të mëtejshme, Cruz mori lajmin e mirë se nuk kishte asnjë problem serioz shëndetësor, duke e quajtur momentin “një mrekulli”.
Aktorja tha se kjo përvojë e ka ndihmuar të vlerësojë më shumë jetën dhe shëndetin, duke theksuar rëndësinë e kujdesit ndaj vetes dhe vazhdimit përpara edhe në situata të vështira.
Në të njëjtën konferencë, ajo falënderoi ekipin e filmit për mbështetjen gjatë kësaj periudhe të vështirë.
Filmi “The Black Ball” ka marrë vlerësime të larta në Festivalin e Cannes, duke u duartrokitur për rreth 16 minuta dhe duke u cilësuar si një nga projektet më të forta të festivalit.
