
Për shkak të motit të keq dhe erërave të forta, Kapiteneria e Portit të Vlorës ka ndaluar lundrimin e mjeteve të vogla dhe anijeve të peshkimit. Nga ora 08:00 e kësaj të mërkure, 18 nëntor, priten erëra të forta me shpejtësi deri në 20 metra në sekondë dhe dallgë që mund të arrijnë 2.5 metra lartësi.
Ndalimi do të jetë në fuqi deri të enjten, më 19 nëntor, në orën 06:00. Ndërkohë, anijet e transportit ndërkombëtar do të vijojnë normalisht lundrimin. Kapiteneria u ka bërë thirrje subjekteve detare të sigurojnë mjetet në port dhe të marrin masat e nevojshme për përballimin e motit të keq.