Kreu i Partisë Demokratike, Sali Berisha hodhi poshtë deklaratat e kryeministrit Edi Rama se jehona ndërkombëtare e protestave lidhet me algoritmet e rrjeteve sociale, duke i cilësuar ato si përpjekje për të shmangur përgjegjësinë politike.
Gjatë një bashkëbisedimi me qytetarët, Berisha akuzoi Ramën se po e trajton Shqipërinë si pronë personale dhe se i hapi rrugë projektit në Zvërnec përmes ndryshimeve në ligjin për zonat e mbrojtura.
Ai u bëri thirrje demokratëve t’u bashkohen protestave, pavarësisht zërave që, sipas tij, kërkojnë ta mbajnë opozitën larg tubimeve. Berisha deklaroi se pjesëmarrja në protesta duhet të jetë sa më e gjerë.
Kreu demokrat komentoi edhe sloganet “Berisha në burg” të dëgjuara në protestë, duke argumentuar se ato përdoren për të zhvendosur vëmendjen nga kritikat ndaj qeverisë dhe për të favorizuar kryeministrin Edi Rama.
"Fajin nuk e kanë as algoritmet, as influencerët, as interneti. Fajin e ka ai që e konsideron Shqipërinë çiflig të tij dhe që për interesa të veta është i gatshëm të marrë çdo vendim. Rruga më e drejtë, paqësore, është krijimi i një qeverie kujdestare, e cila do të përgatisë të gjitha kushtet për një proces zgjedhor të lirë dhe të ndershëm. Qeveria teknike duhet të jetë një qeveri me specialistë, me ekspertë, me qytetarë dhe jashtë partive politike”, u shpreh Berisha.
