Raporti mjeko-ligjor ka zbardhur shkakun e vdekjes së 25-vjeçarit shqiptar Kevin Muharremi, i vrarë më 14 shkurt në Montecalvoli të Italisë. Ai humbi jetën pasi u godit nga një plumb në anën e djathtë të qafës. Sipas autopsisë, plumbi u qëllua nga një armë gjysmëautomatike “Beretta”, kalibër 6.75. Ai dëmtoi rëndë shtyllën kurrizore dhe palcën në rruazat C2 dhe C3, duke shkaktuar paralizë të frymëmarrjes dhe hemorragji të brendshme. Muharremi u prek edhe nga një plumb tjetër në krahun e djathtë, por kjo plagë nuk ka ndikuar në vdekjen e tij.
I dyshuari kryesor për vrasjen është 20-vjeçari shqiptar Renato Xyke. Ai ndodhet në burg që prej ditës së ngjarjes. Xyke u arrestua në Arezzo, teksa po largohej me familjen me një “Range Rover Evoque”, automjeti nga i cili dyshohet se u qëllua ndaj viktimës. Kevin Muharremi ndodhej në sediljen e pasagjerit të një “Fiat Doblò”, ku u gjet pa shenja jete. Në pjesën e përparme të automjetit u konstatuan të paktën gjashtë vrima plumbash. Sipas hetuesve, vrasja ishte kulmi i një konflikti të nisur disa orë më parë në një lokal në Capanne të Montopolit. Përplasja vijoi në parking dhe më pas përmes telefonit, deri në takimin fatal në bulevardin “della Repubblica”.
Nën hetim është edhe një 18-vjeçar shqiptar, i cili ndodhej në makinë me Xyken. Ai është aktualisht i lirë dhe ka dhënë versionin e tij para prokurorisë. Hetimet vijojnë për të rindërtuar plotësisht dinamikën dhe motivin e ngjarjes.
