Një aksident rrugor është regjistruar mbrëmjen e së premtes në aksin Fier-Levan, në vendin e njohur si “Kthesa e Liqenit”. Dy automjete janë përplasur kokë më kokë, duke lënë të plagosur tre persona. Të lënduar kanë mbetur njëri prej drejtuesve të mjeteve dhe dy pasagjerë, të cilët janë transportuar me urgjencë në Spitalin Rajonal të Fierit për të marrë ndihmë mjekësore.
Sipas informacioneve paraprake, njëra prej makinave të përfshira në aksident ishte e zbukuruar për dasmë. Në vendngjarje kanë mbërritur shërbimet e policisë dhe grupi hetimor, të cilët po punojnë për zbardhjen e shkaqeve të aksidentit. Për shkak të përplasjes, qarkullimi në këtë aks rrugor u bllokua për disa minuta.
