Ish-asistenti i Matthew Perry, Kenneth Iwamasa, ka kërkuar zbutje të dënimit në seancën e ardhshme gjyqësore, duke pretenduar se nuk mund t’i thoshte “jo” aktorit kur bëhej fjalë për varësinë e tij nga droga.
Sipas dokumenteve të reja gjyqësore të siguruara nga media amerikane, Iwamasa kundërshtoi pretendimet e prokurorëve se ai mund ta kishte ndalur Perry-n nga përdorimi i ketaminës që i shkaktoi vdekjen në tetor të vitit 2023.
Në deklaratën e tij, ish-asistenti pranoi se marrëdhënia mes tyre “pati pasoja tragjike”, por theksoi se gjatë gjithë kohës kishte vepruar sipas urdhrave të aktorit.
“Kam vepruar gjithmonë sipas kërkesave të Matthew Perry-t dhe jo sipas vendimeve të mia personale,” thuhet në dokumentet e dorëzuara në gjykatë.
Avokati i tij argumentoi se marrëdhënia e punës mes tyre e kishte bërë klientin e tij më të cenueshëm dhe më të përfshirë në skemën e shpërndarjes së drogës.
Kjo deklaratë vjen vetëm pak ditë pasi nëna e aktorit të ndjerë, Suzanne Perry, e akuzoi publikisht Iwamasa-n se kishte ndihmuar në varësinë e djalit të saj në vend që ta mbronte.
Në një deklaratë emocionale në gjykatë, ajo tha:
“Ne i besuam Kenny-t. Detyra e tij më e rëndësishme ishte të ishte shoqëruesi dhe mbrojtësi i Matthew në luftën kundër varësisë.”
Ajo shtoi se familja kishte besuar tek ai për më shumë se 25 vite, por sipas saj, ai “ndihmoi dhe nxiti” varësinë e aktorit.
Matthew Perry u gjet i pajetë në jacuzzi-n e shtëpisë së tij më 28 tetor 2023, në moshën 54-vjeçare. Raporti i autopsisë konfirmoi se shkaku kryesor i vdekjes ishte “efekti akut i ketaminës”.
Në vitin 2024, prokurorët federalë ngritën akuza ndaj pesë personave për shpërndarje dhe komplot lidhur me furnizimin e drogës që çoi në vdekjen e aktorit të serialit Friends.
