Blake Lively është përballur sërish me kritika pas rikthimit në vëmendje të një interviste të sikletshme të vitit 2016, të cilën gazetarja norvegjeze Kjersti Flaa e ka cilësuar si “traumatizuese”.
Në një intervistë për Page Six, Flaa tregoi se përvoja me aktoren e serialit “Gossip Girl” e kishte lënë të shokuar dhe emocionalisht të rënduar.
“Ka qenë një eksperiencë vërtet traumatizuese,” u shpreh gazetarja.
Intervista tashmë virale ishte realizuar gjatë promovimit të filmit Café Society, ku Lively ishte e shoqëruar nga kolegia e saj Parker Posey.
Flaa kujton se në fillim të bisedës kishte uruar aktoren për shtatzëninë, duke i thënë “urime për barkun e tënd”, ndërsa Lively iu përgjigj me ironi: “Urime edhe ty për barkun tënd të vogël.”
Sipas gazetares, atmosfera u bë menjëherë e pakëndshme. Kur ajo tentoi të fliste për kostumet e filmit, Lively reagoi duke thënë se askush nuk do t’ua bënte meshkujve pyetje të tilla. Më pas, aktorja dhe Posey vazhduan të bisedonin mes tyre, duke e injoruar plotësisht intervistuesen.
“Ndihesha sikur po më sulmonin të dyja. Nuk mund të reagoja, sepse kisha frikë se do të përjashtohesha nga intervista të tjera në Hollywood,” tha Flaa.
Ajo shtoi se në industrinë e showbiz-it ekziston një presion i madh për gazetarët që të ruajnë qetësinë edhe në situata të pakëndshme, për të mos rrezikuar karrierën e tyre.
Intervista është rikthyer në qendër të vëmendjes edhe për shkak të betejës ligjore mes Lively dhe ish-kolegut të saj Justin Baldoni, me gazetaren që u përfshi si dëshmitare në proces.
Në fund, Flaa tha se do të kishte mjaftuar me një kërkim faljeje nga Blake Lively për të shmangur gjithë situatën.
“Ajo kishte çdo mundësi ta rregullonte këtë histori, por nuk më kontaktoi kurrë,” deklaroi gazetarja.
