Sam Asghari ka reaguar publikisht ndaj vendimit të ish-bashkëshortes së tij, Britney Spears, për t’u futur vullnetarisht në një qendër rehabilitimi.
Në një deklaratë për TMZ të enjten, më 23 prill, modeli dhe trajneri i fitnesit u shpreh se e mbështet këtë hap të këngëtares, e cila mori vendimin pas arrestimit në mars nën dyshimet për drejtim automjeti nën ndikimin e alkoolit dhe substancave (DUI).
“Besoj se është diçka shumë e mirë,” tha Asghari, 32 vjeç. “Çdo gjë që lidhet me shërimin dhe përmirësimin është pozitive.”
Ai shtoi se gjithçka është në rregull “për aq kohë sa personi vetë është në kontroll të këtij vendimi”.
I pyetur nëse ka pasur kontakte me Spears që nga momenti i shtrimit në qendër, ai konfirmoi se nuk kanë komunikuar.
Më herët, në një intervistë për Fox News në mars, aktori komentoi edhe arrestimin e ish-partneres, duke theksuar se “të gjithë bëjnë gabime” dhe se ai vetë kishte qenë më i fokusuar tek zhvillimet lidhur me luftën në Iran.
Ai gjithashtu kërkoi respektimin e privatësisë së Spears: “Të gjithë e meritojnë privatësinë dhe shpresoj që media të ketë mësuar nga e kaluara t’ia japë hapësirën që i nevojitet.”
Më 12 prill, një përfaqësues i këngëtares konfirmoi se ajo ishte futur vullnetarisht në një qendër trajtimi. Britney u arrestua më 4 mars dhe u lirua një ditë më pas. Në një deklaratë zyrtare, incidenti u cilësua si “i pafalshëm”, ndërsa u theksua se ajo do të ndërmarrë hapat e duhur për të përmirësuar situatën e saj.
“Shpresojmë që ky të jetë fillimi i një ndryshimi të vonuar në jetën e saj dhe që të marrë mbështetjen e nevojshme,” thuhej në deklaratë.
Burime pranë këngëtares bënë me dije se familja dhe të afërmit do të angazhohen për të krijuar një plan mbështetës për mirëqenien e saj.
Britney Spears dhe Sam Asghari nisën lidhjen në vitin 2016 dhe u martuan në qershor 2022. Ata u ndanë në korrik 2023 dhe divorci u finalizua në maj 2024, duke u cilësuar si miqësor dhe pa kontestime mbi marrëveshjen paramartesore.
