Një vendim i fundit “kreativ” ka lënë jashtë versionit final të “The Devil Wears Prada 2” aktoren e njohur Sydney Sweeney.
Sipas burimeve për mediat ndërkombëtare, aktorja e Euphoria kishte xhiruar një skenë rreth tre minuta, e cila do të shfaqej në fillim të filmit.
Në këtë moment, personazhet kryesore të luajtura nga Anne Hathaway, Meryl Streep dhe Stanley Tucci do të takonin Emily Blunt në ambientet e Dior në New York, ku Sweeney do të luante veten si një kliente VIP.
Burimet bëjnë me dije se skena u hoq pasi nuk përputhej me rrjedhën dhe tonin e filmit. Megjithatë, producentët kanë vlerësuar angazhimin e aktores, duke e cilësuar vendimin si të vështirë. Edhe skenaristja Aline Brosh McKenna ka konfirmuar se Sweeney nuk është pjesë e versionit përfundimtar.
Spekulimet për përfshirjen e Sweeney nisën në verën e vitit 2025, kur fansat pretenduan se e panë në setin e xhirimeve në New York. Në atë kohë, aktorja i hodhi poshtë këto zëra.
“The Devil Wears Prada 2” pritet të dalë në kinema më 1 maj, duke rikthyer kastin e njohur të filmit të parë, përfshirë Hathaway, Streep, Tucci dhe Blunt. Në këtë vazhdim do të bashkohen edhe emra të rinj si Lucy Liu, Justin Theroux, Rachel Bloom, B. J. Novak, Kenneth Branagh dhe Simone Ashley.
