Jennifer Aniston ka reaguar në mënyrë diskrete ndaj lajmit se ish-bashkëshorti i saj, Justin Theroux, është bërë baba për herë të parë.
Sipas Page Six, aktorja e serialit “Friends” ka pëlqyer në Instagram postimin e Theroux, ku ai dhe bashkëshortja e tij, Nicole Brydon Bloom, njoftuan ardhjen në jetë të fëmijës së tyre.
Postimi i çiftit përfshinte një foto bardh e zi, ku Theroux shfaqej pa bluzë me foshnjën e porsalindur mbi gjoks, shoqëruar me mbishkrimin: “Ai erdhi në jetë, jemi shumë të dashuruar”.
Jennifer Aniston dhe Justin Theroux u martuan në vitin 2015, por njoftuan ndarjen e tyre në vitin 2018. Në atë kohë, ata theksuan se vendimi ishte i përbashkët dhe miqësor, duke ruajtur një raport të mirë edhe pas divorcit. Më vonë, vetë Theroux e përshkroi ndarjen si “shumë të qetë” dhe pa konflikte.
Pas ndarjes, Justin Theroux u martua me Nicole Brydon Bloom në mars 2025, ndërsa së fundmi u bënë prindër për herë të parë. Nga ana tjetër, Jennifer Aniston ka vazhduar jetën e saj personale dhe është në një lidhje me Jim Curtis. Çifti e bëri publike romancën në fund të vitit 2025.
