Alec Baldwin do të përballet sërish me drejtësinë, pasi një gjyqtar i Gjykatës së Lartë të Los Anxhelosit ka vendosur që një padi civile e ngritur nga një anëtar i stafit të filmit “Rust” të vazhdojë në gjykim.
Sipas raportimeve të mediave amerikane, përfshirë Variety dhe People, padia është ngritur nga Serge Svetnoy, një teknik ndriçimi në setin e filmit, i cili ishte i pranishëm gjatë incidentit tragjik të tetorit 2021, ku humbi jetën kineastja Halyna Hutchins.
Gjyqtari në vendimin e tij theksoi se “një juri e arsyeshme mund të arrijë në përfundimin se Baldwin ka shpërfillur në mënyrë të pamatur rrezikun që vjen nga drejtimi i një arme drejt një personi, me gishtin në këmbëz, duke shkaktuar shqetësim emocional”.
Ngjarja ndodhi gjatë provave për një skenë, kur Baldwin po praktikonte një lëvizje me armë. Arma u shkreh, duke goditur për vdekje Hutchins. Svetnoy ndodhej vetëm disa metra larg dhe ishte ndër të parët që i dha ndihmë viktimës.
Në padi thuhet se ai ishte “brenda zonës së rrezikut” dhe se plumbi mund ta kishte vrarë edhe atë për pak centimetra. Padia thekson gjithashtu se skena nuk kërkonte që arma të qëllohej dhe se nuk duhej të kishte asnjë plumb të vërtetë në set.
Fillimisht, Baldwin u përball me akuza penale për vrasje nga pakujdesia, por ato u rrëzuan përfundimisht nga një gjyqtar në Santa Fe në korrik 2024. Aktori ka këmbëngulur vazhdimisht se nuk e ka tërhequr këmbëzën e armës. Në intervista të mëparshme, ai ka përshkruar momentin si një shkrehje të papritur.
Ndërkohë, Serge Svetnoy nuk pësoi lëndime fizike, por pretendon se përjetoi traumë të rëndë emocionale nga incidenti.
