Dy të rinj janë arrestuar nga policia në Shkodër në kuadër të një operacioni për goditjen e veprimtarive kriminale në fushën e narkotikëve. Në kërkim është shpallur një tjetër, i akuzuar si bashkëpunëtor i tyre.
Dy personat, 18 dhe 20-vjeç, kishin marrë një ambient me qira në të cilin fshihnin lëndë narkotike dhe e përgatisin për shitje. Ata u kapën në flagrancë në lagjen “Manush Alimani”, me doza kokaine dhe kanabisi, gati për shitje. Sipas policisë, ata ua shisnin lëndën narkotike kryesisht moshave të reja.
Në kërkim u shpall shtetasi L. A., 23 vjeç pasi ishte ky që e kishte marrë banesën me qira bashkë me dy të tjerët për këtë aktivitet. Policia thotë se ka sekuestruar lëndën narkotike kokainë dhe kanabis, qese farmaceutike për paketimin e tyre, 5 peshore elektronike, 1 armë e ftohtë, 1 motomjet dhe një shumë parash e dyshuar e përfituar prej trafikimit të lëndëve narkotike.
Njoftimi i policisë:
Vijojnë operacionet e njëpasnjëshme për goditjen e veprimtarive kriminale në fushën e narkotikëve. Zbulohet një ambient i marrë me qira,ku shërbente për të fshehur lëndën narkotike dhe për përgatiteje për shitje.
Kapen në flagrancë dhe vihen në pranga 2 shtetas. Shpallet në kërkim bashkëpunëtori i tyre.
Sekuestrohen lëndë narkotike kokainë dhe Cannabis Sativa, qese farmaceutike për paketimin e tyre, 5 peshore elektronike, 1 armë e ftohtë, 1 motomjet që përdorej për këtë veprimtari kriminale dhe një shumë parash e dyshuar e përfituar prej saj.
Specialistët për Hetimin e Narkotikëve të DVP Shkodër, në bashkëpunim me Seksionin e Mbështetjes Operacionale dhe Forcën e Posaçme “Shqiponja”, bazuar në informacionet e siguruara për shitje të lëndëve narkotike në qytetin e Shkodrës, organizuan dhe finalizuan operacionin e koduar “Target Group”.
Si rezultat i operacionit u arrestuan shtetasit N. F., 18 vjeç dhe K. Z., 20 vjeç, të dy banues në Shkodër. Ata u kapën në flagrancë nga shërbimet e Policisë, në lagjen “Manush Alimani”, me doza të lëndëve të dyshuara narkotike kokainë dhe Cannabis Sativa, të cilat i posedonin me qëllim shitjen, kryesisht tek moshat e reja.
Gjithashtu, u shpall në kërkim bashkëpunëtori i tyre, shtetasi L. A., 23 vjeç, banues në Shkodër.
Ky shtetas kishte marrë me qira një ambient në lagjen “Manush Alimani”, ku, bashkë me dy shtetasit e arrestuar, fshihnin lëndën narkotike dhe e përgatitnin në doza për shitje.
Në cilësinë e provës materiale u sekuestruan një sasi e madhe dozash të lëndëve të dyshuara narkotike kokainë dhe Cannabis Sativa, qindra qese farmaceutike për paketimin e tyre, 5 peshore elektronike, 2 celularë, 1 armë e ftohtë (shkop metalik), 1 motomjet që përdorej për këtë veprimtari kriminale dhe një shumë parash e dyshuar e përfituar prej saj.
Vijon puna për kapjen e shtetasit në kërkim dhe për dokumentimin e plotë të kësaj veprimtarie kriminale. Materialet procedurale iu kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme hetimore.
