Reperi i njohur Offset është qëlluar me armë zjarri të hënën në Florida, vetëm pak çaste pasi ishte parë duke buzëqeshur dhe pozuar me fansat në një kazino.
Përfaqësues të artistit konfirmuan se ai ndodhet në spital dhe është jashtë rrezikut për jetën.
“Mund të konfirmojmë se Offset është qëlluar dhe aktualisht po merr trajtim mjekësor. Gjendja e tij është stabile dhe po monitorohet nga afër,” thuhet në deklaratë.
Sipas raportimeve, incidenti ndodhi pranë Seminole Hard Rock Hotel & Casino.
Policia bëri të ditur se ngjarja ndodhi në zonën e parkimit rreth orës 19:00 dhe rezultoi në plagosje jo kërcënuese për jetën. I plagosuri u transportua në spitalin Memorial Regional në Hollywood, ndërsa autoritetet konfirmuan se situata u vu shpejt nën kontroll dhe dy persona janë ndaluar. Hetimet vijojnë dhe deri tani nuk dihet motivi apo identiteti i autorit.
Pak para të shtënave, Offset — emri i vërtetë i të cilit është Kiari Kendrell Cephus — ishte parë duke bashkëbiseduar dhe bërë foto me fansat. Dëshmitarët thanë se reperi dukej i qetë dhe miqësor para incidentit.
