Kate Beckinsale ka kritikuar publikisht kolegun e saj Mark Ruffalo, duke pretenduar se ajo u pushua nga agjenti i tyre i përbashkët pasi pëlqeu një postim në mbështetje të një armëpushimi në Gaza.
Në një seri komentesh në Instagram (të fshira më pas), Beckinsale shkroi se është “shumë e lehtë” për disa në Hollywood të mos përballen me pasoja të tilla.
“Sa bukur duhet të jetë të mos pushosh nga agjenti yt vetëm sepse pëlqen një postim për armëpushim dhe kundër vrasjes së fëmijëve,” u shpreh ajo.
Komentet e saj erdhën nën një postim të Ruffalo-s që promovonte filmin “Palestine 36”.
Beckinsale shkoi më tej duke sugjeruar se në industri ekziston një standard i dyfishtë gjinor.
“Supozoj se të qenit mashkull në Hollywood ka shumë rëndësi,” shkroi ajo, duke theksuar se Ruffalo nuk u pushua nga i njëjti agjent.
Aktorja pretendon se u largua nga agjenti në të njëjtën ditë me Susan Sarandon, pak kohë pas përfundimit të grevës së Screen Actors Guild që zgjati disa muaj në vitin 2023.
Në reagimin e saj, Beckinsale tregoi gjithashtu se pushimi nga puna erdhi në një moment shumë të rëndë personal.
Ajo zbuloi se nëna e saj ishte diagnostikuar me kancer në tru dhe kishte pak javë jetë, ndërsa njerku i saj kishte pësuar një goditje të rëndë në tru, përveç problemeve të tjera shëndetësore.
“U pushova me vetëm dy fjali, pas 12 vitesh miqësie me agjentin tim,” shkroi aktorja, duke shtuar se ndihej e vetme në atë periudhë.
Kate deklaroi se i kishte dërguar një mesazh privat Ruffalo-s muaj më parë për situatën, por ai nuk i ishte përgjigjur.
Megjithatë, më vonë ajo sqaroi se nuk e fajëson aktorin dhe se e mbështet atë dhe qëndrimet e tij. “E di që nuk do të marr përgjigje, dhe e mbështes atë në gjithçka që bën,” shtoi Beckinsale.
