Kyedemokrati, Sali Berisha, ka folur këtë të mërkurë në lidhje me rritjen e çmimeve, ndërsa ka akuzuar qeverinë Rama për dështim në mbrojtjen e konsumatorëve. Në një deklaratë për mediat, Berisha u shpreh se Shqipëria ka ligje të mira për mbrojtjen e konkurrencës dhe konsumatorit, por sipas tij ato nuk zbatohen.
Ai theksoi se institucionet përkatëse janë të kapura dhe nuk reagojnë ndaj abuzimeve në treg, ndërsa ka paralajmëruar një “luftë frontale” ndaj oligopoleve në vend. Berisha ngriti më tej shqetësimin për nivelin e lartë të taksave, veçanërisht për karburantet, të cilat sipas tij janë ndër më të lartat në Europë dhe ndikojnë drejtpërdrejt në rritjen e kostos së jetesës.
“Shqipëria ka ligje, dhe ligje të mira, të cilat, të zbatuara, mbrojnë qytetarët nga oligopoli. Ndaj dhe një nga drejtimet e punës tonë dhe përpjekjet tona, do të jetë mbrojtja e qytetarëve nga oligopolet. Absolutisht ne nuk jemi kundër bizneseve, kurrë, ne jemi partia më pro-biznes. Në mënyrë të përsëritur, ne kemi denoncuar taksat katastrofike mbi litrin e naftës. Po. Më të lartat, mund të jenë më të lartat në botë, në Europë po, kur një litër në SHBA shitet me 1 dollarë, kurse këtu taksa është 1.1 dollarë, kjo tejkalon çdo lloj logjike ekonomike dhe pa diskutim është një bazë për çmimin në këtë shkallë. Dhe ne, kudo që do të gjejmë abuzim me taksat, le që ne e kemi modelin taksë e ulët 10 përqind, por ne do studiojmë kudo që janë, veçse detyrimi ynë është të identifikojmë institucionet e korruptuara, të cilat i kanë futur në xhep oligopolet. Se ka një ligj për mbrojtjen e konsumatorit, se ka një zinxhir institucionesh për mbrojtjen e konsumatorit, se që të gjithë si të droguar, nuk pyesin njëherë për konsumatorin. Imagjinoni ju, personi që drejton antikonkurrencën ishte një nga hajdutët më të papërmbajtur në krye të prokurimeve, Denar Biba.
Imagjinoni ju kush merret me këtë. Dhe qytetarët robtohen, vidhen, rripen nga kafshata në çdo gjë tjetër. Oligopolet Doshi-Nushi janë më të këqij se sëmundjet për të sëmurët shqiptarë me çmimet, me të skaduarat, me të gjitha. Pra, është në detyrimin tonë të përgatisim kuadrin më të mirë, alternativën më të mirë kundër veprimtarisë shkatërrimtare mbi ekonominë e qytetarëve të oligopoleve. Të ndalemi në çdo hallkë, të kalojmë në sitë të gjitha faktorët që ndikojnë në këto çmime të tmerrshme. Pse rriten çmimet në Shqipëri si në asnjë vend tjetër? Pse Shqipëria, me fuqinë blerëse më të ulët në rajon, ka çmime mesatare më të larta se BE? Është në detyrimin madhor të PD të ndërmarrë një luftë frontale në mbrojtjen më të vendosur të interesave të qytetarëve. Çfarë ndodh me ligjet ekzistuese? Janë ligje shumë të mira. Në qoftë se zbatohen, nuk mundet që çmimet të shkojnë lart e më lart. Të shkojnë më lart se vendet me fuqi blerëse 5 herë më të madhe se ne. Ndaj dhe aktualisht problem madhor është nafta, se është i mprehtë, por duhet të jemi të vërtetë, po kaq problem është kafshata. Sheqeri, orizi, mishi, të gjitha këto janë oligopole. Dhe mund të ketë edhe të tjera, një seri të tjerash. Edhe njëherë, nuk janë fenomen vetëm shqiptar, jo. Por për të mbrojtur konsumatorët, çdo shtet ka ligje dhe institucione, të cilat bizneseve u garantojnë veprimtari normale, u garantojnë fitimin, por nga ana tjetër mbrojnë konsumatorin,“ tha Berisha.
