Një aksident rrugor është regjistruar mbrëmjen e sotme në aksin nacional Korçë–Maliq, ku tre persona kanë mbetur të plagosur. Sipas informacioneve paraprake, një automjet tip “Opel Corsa”, teksa ka tentuar të kalojë në një rrugë dytësore në anën tjetër të karrexhatës, është përplasur kokë më kokë me një mjet tip “BMW”.
Si pasojë e përplasjes janë lënduar tre anëtarë të së njëjtës familje, babai dhe dy fëmijët e mitur. Ata janë transportuar me urgjencë në Spitalin Rajonal të Korçës për ndihmë mjekësore. Policia ndodhet në vendngjarje dhe po punon për sqarimin e plotë të rrethanave të aksidentit.
