Partia Demokratike ka nisur përgatitjet për zgjedhjet e saj në strukturat e degëve dhe në qendër. Sot, PD-ja ka publikuar udhëzimet për procesin zgjedhor dhe organizativ të brendshëm. Sipas dokumentit, në maj të këtij viti përfundon mandati katërvjeçar i organeve drejtuese të partisë. Kjo e bën të domosdoshëm rinovimin e tyre përmes një procesi statutor, të rregullt dhe transparent.
Në këtë kuadër, është vendosur që zgjedhjet të zhvillohen në të gjitha degët dhe nivelet e strukturës së Partisë Demokratike deri më 30 prill 2026. Këtu përfshihen postet nga kryetarët e seksioneve deri te drejtuesit e degëve dhe kryesitë përkatëse. Në udhëzim nënvizohet se procesi duhet të zhvillohet në përputhje me Statutin e partisë.
Ky zhvillim vjen në një moment të tensionuar politik. Partia Demokratike po përgatitet edhe për procesin e saj të brendshëm elektoral, ndërsa prej disa muajsh zhvillon protesta të vazhdueshme kundër qeverisë, duke denoncuar skandale korruptive, veçanërisht ato që lidhen me ish-zv.kryeministren Belinda Balluku dhe çështjen e AKSHI-t. Paralelisht me kërkesën për dorëheqjen e kryeministrit Edi Rama dhe krijimin e një qeverie teknike për zgjedhje të reja.
