Anëtaret e grupit Pussycat Dolls, Nicole Scherzinger, Ashley Roberts dhe Kimberly Wyatt, kanë konfirmuar më në fund një thashethem që qarkullonte prej vitesh: Britney Spears ishte planifikuar të bënte një paraqitje speciale në videoklipin e tyre të vitit 2008 “When I Grow Up”.
Në një intervistë ekskluzive për “Page Six Radio”, Wyatt zbuloi se në një skenë të videoklipit, ku grupi përshëndet me dorë, ishte menduar që në atë moment të shfaqej Britney Spears.
“Kur ne kthehemi dhe përshëndesim, ishte planifikuar që aty të ishte Britney”, tha ajo, duke shtuar se artistja mund të ketë filmuar pjesë të klipit, por për arsye të panjohura projekti nuk u finalizua kurrë.
Grupi i famshëm ishte edhe pjesë e turneut të Spears në vitin 2008, “The Circus Starring Britney Spears”, gjatë promovimit të albumit të tyre “Doll Domination”, ku kënga “When I Grow Up” ishte kënga kryesore.
Edhe pse Pussycat Dolls u shpërbë në vitin 2010, së fundmi është konfirmuar se disa prej anëtareve do të rikthehen në skenë me një turne në Amerikën e Veriut, duke shënuar rikthimin e tyre pas më shumë se një dekade.
Ndërkohë, rikthimi i tyre vjen pas diskutimeve dhe një beteje ligjore mes anëtares Nicole Scherzinger dhe krijueses së grupit, Robin Antin, lidhur me turneun e anuluar më parë.
