Izraeli dhe Shtetet e Bashkuara ndërmorën këtë të shtunë një sulm ndaj Iranit. Lajmi u bë i ditur nga ministri i Mbrojtjes i Izraelit, Israel Katz, që shpalli gjendjen e jashtëzakonshme në vend. Katz paralajmëroi një kundërpërgjigje të mundshme të Iranit me dronë dhe raketa balistike. Disa media izraelite raportuan se lideri suprem iranian, Ajatollah Ali Khamenei, mund të jetë vrarë. Megjithatë ky informacion nuk është konfirmuar zyrtarisht.
Sipas raportimeve, objektivat e goditura përfshinin institucione kyçe në Teheran, si parlamentin, presidencën, Këshillin Suprem të Sigurisë Kombëtare, Ministrinë e Inteligjencës dhe Organizatën e Energjisë Atomike. Media amerikane Fox News raportoi gjithashtu për sulme kibernetike ndaj mediave iraniane, përfshirë agjencinë shtetërore IRNA.
Si kundërpërgjigje, Irani ka nisur sulme raketore ndaj objektivave në Jordani, Bahrein dhe Katar. Shpërthime të forta u dëgjuan edhe në Doha, pak minuta pasi Ministria e Mbrojtjes e Katarit njoftoi se raketat iraniane ishin interceptuar. Objektiva amerikane u goditën edhe në Emiratet e Bashkuara Arabe.
Sipas The New York Times, operacioni kundër Iranit pritet të jetë më i gjerë se sulmet ajrore të qershorit ndaj impianteve bërthamore. Presidenti Donald Trump konfirmoi nisjen e fushatës ushtarake. Ai deklaroi se Irani nuk do të lejohet të zotërojë armë bërthamore dhe se përpjekjet për marrëveshje kishin dështuar.
