Rebecca Loos, ish-asistentja personale e David Beckham që dikur pretendoi se kishte pasur një aferë me të, ka dalë publikisht në mbështetje të Brooklyn Beckham mes përplasjes së tij të ashpër me prindërit.
Loos, sot instruktore yoga, reagoi në Instagram ndaj një komenti të një ndjekësi, duke përgëzuar Brooklyn-in për deklaratën e tij publike, në të cilën ai akuzon prindërit se e kanë kontrolluar për vite me radhë dhe se kanë tentuar të dëmtojnë martesën e tij me Nicola Peltz.
“Jam shumë e lumtur që më në fund po qëndron për veten dhe po flet publikisht. Më ka ardhur shumë keq për gruan e tij, duke e ditur shumë mirë se si mund të sillen ata,” shkroi Loos, duke iu referuar çiftit Beckham. Në një koment tjetër ajo shtoi: “E vërteta gjithmonë del në shesh.”
Rebecca Loos deklaroi publikisht në vitin 2004 se kishte pasur një lidhje me David Beckham gjatë kohës që ai luante për Real Madrid në Spanjë. Edhe pse David dhe Victoria i mohuan me forcë akuzat, Loos ka këmbëngulur në versionin e saj ndër vite.
Nga ana tjetër, Brooklyn Beckham, 26 vjeç, reagoi së fundmi përmes Instagram Stories, duke thënë se nuk kishte më “asnjë zgjidhje tjetër” përveçse të fliste hapur. Ai deklaroi se nuk dëshiron pajtim me familjen e tij dhe se për herë të parë në jetë po vepron i lirë nga kontrolli i prindërve.
“Për gjithë jetën time, prindërit e mi kanë kontrolluar narrativat në media për familjen tonë,” shkroi ai, duke i akuzuar për marrëdhënie joautentike, postime performative në rrjete sociale dhe përhapje të gënjeshtrave për të ruajtur “fasadën” e markës Beckham.
Brooklyn akuzoi gjithashtu prindërit se janë përpjekur vazhdimisht të shkatërrojnë marrëdhënien e tij me Nicola Peltz, përfshirë anulimin në minutën e fundit të fustanit të nusërisë nga Victoria Beckham dhe një incident në dasmën e tyre, ku, sipas tij, Victoria i prishi momentin e vallëzimit të parë me nusen.
“Familja ime vlerëson promovimin publik dhe marrëveshjet tregtare mbi gjithçka tjetër. ‘Dashuria’ matet me sa poston në rrjete sociale,” shtoi ai.
Burime pranë çiftit kanë deklaruar se gjithçka që Brooklyn ka thënë është e vërtetë dhe se aktualisht një pajtim nuk duket i mundur, për shkak të një “prishjeje të madhe të besimit”.
Sipas tyre, Brooklyn dhe Nicola kanë tentuar ta zgjidhin situatën privatisht, por kanë arritur në pikën kur nuk mund t’u besojnë më David dhe Victoria Beckham.
