Regjisori i Glambot-it, Cole Walliser, ka hedhur poshtë pretendimet se Jennifer Lopez u tregua “e pasjellshme” ndaj tij gjatë xhirimit të saj në Golden Globes 2026.
Në një video në Instagram të publikuar të dielën, kineasti kanadez tha se momenti viral është keqinterpretuar.
“Nuk e mora personale. Në atë moment nuk u ndje aspak si mungesë respekti,” u shpreh Walliser, duke pranuar se “disa gjëra e nxitën këtë ide”.
Sipas tij, Lopez ishte thjesht “e fokusuar në punë”, pasi tapeti i kuq po mbyllej. “Ajo ishte gati të hynte brenda. E dinte saktësisht çfarë do të bënte. U pozicionua dhe u përgatit për lëvizjen,” shpjegoi ai.
Walliser shtoi se ishte “fat i keq” që në klipin viral këngëtarja dhe aktorja 56-vjeçare shihet me shpinë nga ai. “Po i flisja, ajo po shikonte nga ana tjetër sepse po përgatitej për momentin e saj. Nuk kishte arsye t’i thosha ‘kthehu dhe shiko’ — e dija çfarë po bënte,” tha ai.
Videoja e Glambot-it, e shpërndarë javën e kaluar nga vetë Walliser, tregonte Lopez teksa nuk reagonte ndaj udhëzimeve dhe thjesht kthehej për të demonstruar pozën.
Pas xhirimit, Walliser e përgëzoi me “Slayed it, as usual”, ndërsa Lopez i bëri një përshëndetje të vogël dhe vazhdoi rrugën në tapetin e kuq me ekipin e saj.
Në përshkrimin e videos, Walliser theksoi se Lopez mbërriti shumë afër mbylljes së tapetit (madje mund të kishte qenë i mbyllur), ndaj ishte i lumtur që ajo arriti të ndalej shpejt: “Pa humbur kohë — thjesht bam, bam, faleminderit, GLAM!”
Megjithatë, disa ndjekës në rrjete sociale e kritikuan sjelljen e Lopez, duke e quajtur “të ftohtë” ose “të pasjellshme”.
Walliser këmbëngul se perceptimi është i gabuar dhe se gjithçka ishte thjesht çështje kohe dhe profesionalizmi.
