Valentino Garavani, dizajneri legjendar italian dhe themeluesi i markës luksoze Valentino, ka ndërruar jetë ditën e hënë në moshën 93-vjeçare.
Lajmi u bë i ditur nga fondacioni i tij përmes një njoftimi në rrjetet sociale, ku thuhet se:
“Valentino Garavani u nda nga jeta sot në rezidencën e tij në Romë, i rrethuar nga njerëzit e tij më të dashur.”
Valentino, i njohur në mbarë botën vetëm me emrin e tij të parë, themeloi shtëpinë e modës Valentino në vitin 1960 në Romë.
Ai u bë shpejt i famshëm për krijimet e tij elegante, veçanërisht për fustanet në nuancën karakteristike që u pagëzua si “Valentino red”, një ngjyrë që u kthye në simbol të markës.
Marka njohu sukses ndërkombëtar në vitin 1964, kur Zonja e Parë e SHBA-së, Jacqueline Kennedy, nisi të vishej me krijimet e tij. Pas vrasjes së Presidentit John F. Kennedy, ajo porositi gjashtë fustane couture bardh e zi nga Valentino.
Ai gjithashtu realizoi fustanin e saj të dasmës për martesën me Aristotle Onassis në vitin 1968.
Përveç lidhjes së fortë me botën e modës, Valentino pati edhe një marrëdhënie të veçantë me kinemanë. Ai jo vetëm që veshi yje të mëdhenj të ekranit, por u shfaq edhe si vetvetja në filmin e njohur të vitit 2006, “The Devil Wears Prada”, përkrah Anne Hathaway dhe Meryl Streep.
Në vitin 2008, jeta dhe karriera e tij u pasqyruan në dokumentarin “Valentino: The Last Emperor”, i cili u shfaq premierë në Festivalin e Filmit në Venecia, duke sjellë një portret intim të një prej figurave më me ndikim në historinë e modës.
