Gwyneth Paltrow ka bërë një koment të rrallë për ish-të dashurin e saj, Ben Affleck, gjatë episodit të së martës të podcastit “Good Hang” të Amy Poehler.
Aktorja 53-vjeçare e përmendi Affleck pa ia përmendur emrin drejtpërdrejt, ndërsa po fliste për miqësinë e saj me aktorin e ndjerë Robin Williams. Paltrow tregoi se kishte pasur mundësi ta njihte më nga afër Williams-in gjatë periudhës së publikimit të filmit “Good Will Hunting” në vitin 1997.
“E njoha pak më shumë kur doli ‘Good Will Hunting’, sepse në atë kohë po dilja me një nga personat që e kishte shkruar filmin dhe që luante në të,” tha ajo, duke iu referuar Ben Affleck-ut.
Amy Poehler reagoi me humor, duke shtuar se Affleck ishte “shumë i mirë në atë film”, gjë me të cilën Paltrow u pajtua plotësisht. Ajo e cilësoi filmin si “perfekt” dhe shprehu dashurinë e saj për të.
Gwyneth Paltrow dhe Ben Affleck nisën lidhjen e tyre në vitin 1997, pak kohë pas ndarjes së saj nga Brad Pitt. Çifti luajti bashkë në filmat “Shakespeare in Love” (1998) dhe “Bounce” (2000), përpara se të ndaheshin përfundimisht po atë vit.
Së fundmi, autorja Amy Odell ka hedhur dritë mbi marrëdhënien e tyre në librin “Gwyneth: The Biography”, duke përshkruar një lidhje me ulje-ngritje. Sipas saj, Affleck po përballej me vështirësi personale në atë periudhë, ndërsa miqtë e Paltrow kishin rezerva për marrëdhënien, duke menduar se ajo nuk merrte gjithmonë të njëjtin nivel përkushtimi.
Pas ndarjes nga Ben, aktorja u lidh me këngëtarin e Coldplay, Chris Martin, me të cilin ka dy fëmijë. Çifti u nda në vitin 2016. Aktorja është aktualisht e martuar me producentin dhe skenaristin Brad Falchuk.
Ben Affleck, nga ana e tij, ka qenë i martuar me Jennifer Garner dhe më pas me Jennifer Lopez.
