Deputetja Zegjine Çaushi, ka reaguar pas lajmeve të publikuara, ku është pretenduar se ajo ka punuar si “rojtare” në kompaninë “Illyrian Guard”.
Çaushi ka publikuar dokumentet zyrtare, ku ka nënvizuar qartë se pozicioni i saj ka qenë juriste, duke kundërshtuar në këtë mënyrë informacionin e bërë publik më së fundmi.
Ajo sqaron më tej qytetarët e qarkut Fieri, ata të cilët e zgjodhën me votë në zgjedhjet e 11 Majit, se përgjatë viteve ka mbajtur disa pozicione, përfshirë specialiste e emergjencave civile, kryeinspektorë e IVMT, si dhe juriste pranë dy shoqërive, mes tyre edhe “Illyrian Guard”, ku ka punuar nga 16 maj 2024 deri më 25 mars 2025.
Gjithashtu, ajo bën të ditur se të ardhurat e saj janë të gjitha të deklaruara zyrtarisht dhe të shoqëruara me dokumentacionin përkatës, ndërsa largimi i saj nga “Illyrian Guard” ka ndodhur në një datë tjetër nga ajo që është publikuar në media.
“Të dashur qytetarë të Qarkut Fier, Për ju ndiej detyrim të reagoj.
Me gjithë respektin e madh që kam për mediat dhe gazetarët, ju lutem të ushtroni profesionin tuaj brenda kufijve të informacionit të saktë dhe verifikimit paraprak. Qytetarët tanë meritojnë të informohen drejt, jo të dezinformohen.
Sqarim publik: Së pari, kushdo është i lirë të bëjë lajm, por jo duke shtrembëruar faktet. Pozicionet e mia të punës, ndër vite, kanë qenë: 1. Specialiste e Emergjencave Civile 2. Kryeinspektore e IVMT 3. Juriste pranë shoqërisë “BA2” shpk (ndryshe nga çfarë paraqitet në media) 4. Juriste pranë shoqërisë “Illyrian Guard” ( Nga data 16 Maj 2024 deri në datën 25 Mars 2025, ndryshe nga çfarë paraqitet ne media)
Sa i përket të ardhurave të mia, ato janë të gjitha të deklaruara zyrtarisht (me transaksionet bankare), të shoqëruara me dokumentacionin përkatës pranë institucioneve përkatëse. Ndërsa përsa i përket largimit tim nga puna në “Illyrian Guard”, sqaroj se shkëputja ka ndodhur në datën 25 mars 2025, ndryshe nga sa është paraqitur në media”, shkruan deputetja duke nënvizuar se transparenca do të mbetet parimi i saj kryesor dhe se do të vazhdojë t’u përgjigjet çdo përgjigjet çdo keqinformimi që cenon integritetin e saj profesional.
