Sali Berisha në "Foltoren" para kryeministrisë ka deklaruar këtë të hënë se droga e Edi Ramës ka marrë dhenë ndërsa theksoi se kreu i qeverisë krahasohet sot me narkodiktatorët më të urryer të planetit.
Sali Berisha i bëri thirrje të rinjve nga Bulevardi "Dëshmorët e Kombit" se duhet të qëndrojnë në këmbë dhe të bashkuar për të shpëtuar vendin nga katastrova qeverisëse.
"Këto mesazhe janë një thirrje, një inkurajim i madh për ne të vazhdojmë këtë betejë me të gjithë guximi dhe fuqitë tona. Sonte para nesh folën disa të rinj dhe i përgëzoj për fjalët e shkëlqyera që mbajtën.
Atyre dhe çdo të riu shqiptar u rikujtoj se historia, koha thërret secilin prej tyre të jetë në këmbë për të shpëtuar vendin nga kjo katastrofë e vërtetë në të cilën rrokulliset."-tha Berisha.
Gjatë fjalës së tij, Sali Berisha hodhi akuza ndaj Edi Ramës dhe Erion Veliajt në lidhje me inceneratorët. Berisha u shpreh se inceneratorët nuk ekzistojnë se paratë i kanë vjedhur Rama-Veliaj.
Kreu i PD, shtoi më tej se AKSHI është kopështi privat i Edi Ramës ku baxhanaku i tij fiton me dhjetëra tendera. Berisha tha se denoncimet janë të pafundme por atij s'i ndodh asgjë dhe vjedhjet e taksave të qytetarëve vazhdojnë.
"Është kopështi privat i Edi Ramës në të cilin baxhanaku i tij ka fituar me dhjetëra tendera. Çfarë i ka ndodhur atij? I denoncuar me dhjetëra herë, nuk i ka ndodhur asgjë, përkundrazi vazhdon të vjedhë taksat tuaja."-tha Berisha.
Denoncimet dhe deklaratat e Sali Berishës duket se janë si ato të zakonshmet, pa diçka të re, ndërsa qytetarët masivisht e kanë refuzuar.
