Blake Lively ka ngritur padi duke pretenduar se ka humbur 161 milionë dollarë për shkak të një fushate shpifjeje që, sipas saj, është organizuar gjatë publikimit të filmit “It Ends With Us”.
Sipas dokumenteve të paraqitura në gjykatë dhe të siguruara nga Variety, avokatët e Lively pretendojnë se aktorja ka pësuar:
- 56.2 milionë dollarë humbje nga të ardhurat e saj në aktrim, prodhim, fjalime publike dhe marrëveshje reklamuese;
- 49 milionë dollarë humbje nga linja e kujdesit të flokëve “Blake Brown”;
- 22 milionë dollarë humbje nga bizneset e saj të pijeve “Betty Buzz” dhe “Betty Booze”
- si dhe 34 milionë dollarë dëme të drejtpërdrejta në reputacionin e saj publik.
Në total, dëmet e pretenduara arrijnë në 161 milionë dollarë, ndërsa avokatët e aktores kërkojnë që gjykata të shqyrtojë edhe dëmshpërblime ndëshkuese.
Lively ka paditur regjisorin e filmit, Justin Baldoni, si dhe kompaninë e tij Wayfarer Studios, duke e akuzuar për ngacmim seksual gjatë xhirimeve të filmit në vitin 2024.
Pas akuzave, Baldoni kundërpaditi Blake Lively dhe bashkëshortin e saj, aktorin Ryan Reynolds, duke i akuzuar për shpifje dhe tentativë shantazhi, me një kërkesë për dëmshpërblim prej 400 milionë dollarësh.
Megjithatë, në qershor të këtij viti, gjykatësi federal Lewis Liman hodhi poshtë padinë e Baldonit, pasi ai dhe ekipi i tij nuk paraqitën një ankesë të re brenda afatit të përcaktuar.
“Klientët tanë zgjodhën të mos paraqesin një ankesë të re për të ruajtur të drejtën e apelimit,” – deklaroi avokati i Baldonit, Bryan Freedman, për Page Six.
“Tani jemi përqendruar plotësisht në pretendimet e zonjës Lively dhe presim ditën tonë në gjykatë,” – shtoi ai.
Sipas raportimeve të Associated Press, gjykata federale në Nju Jork ka caktuar marsin e vitit 2026 si datë për gjykimin e çështjes së ngritur nga Blake Lively kundër Justin Baldonit dhe kompanisë së tij Wayfarer Studios.
