Romanca mes Sydney Sweeney dhe Scooter Braun po bëhet çdo ditë e më serioze. Aktorja e “Euphoria”-s, 28 vjeç, dhe producenti muzikor 44-vjeçar u fotografuan më 4 nëntor duke ndarë një puthje në Central Park, Nju Jork.
Lajmet për lidhjen e tyre nisën në shtator, kur burime për People konfirmuan se dyshja po dilnin pas disa takimeve në Los Angeles. Më vonë, më 30 shtator, ata u panë duke u mbajtur për dore gjatë një nate romantike.
Një burim afër çiftit tha për People se Sweeney dhe Braun “kanë shumë gjëra të përbashkëta dhe asnjëri s’e vret mendjen për mendimin e të tjerëve.” Miqtë e aktores janë gjithashtu të lumtur për të: “Është një lehtësim ta shohim kaq të lumtur,” shtoi burimi.
Nga ana tjetër, edhe miqtë e Braun e shohin këtë lidhje si pozitive: “Nuk e kanë parë kaq të qetë prej kohësh. Ai e adhuron, mendon se është inteligjente, e sjellshme dhe shumë argëtuese. Ndërsa ajo e vlerëson sepse ai e sheh përtej famës dhe thashethemeve.”
Sweeney i dha fund fejesës me ish-të fejuarin e saj Jonathan Davino më herët këtë vit, ndërsa Braun ka qenë i martuar me sipërmarrësen Yael Cohen nga viti 2014 deri në ndarjen e tyre në 2021. Ata kanë tre fëmijë: Jagger (10), Levi (8) dhe Hart (6).
Dyshja besohet se janë afruar gjatë dasmës luksoze të Jeff Bezos dhe Lauren Sánchez në Itali, në qershor, ku burime thanë se “Scooter arriti ta impresiononte Sydney-n dhe ajo ndjeu që ai ishte i sinqertë.”
Aktualisht, Sweeney është në prag të premierës së filmit biografik Christy, ku interpreton boksieren e njohur Christy Martin. Filmi del në kinema më 7 nëntor, ndërsa në fund të vitit ajo do të rikthehet me një tjetër projekt – adaptimin filmik të romanit The Housemaid, që do të shfaqet më 25 dhjetor.
