Aktori australian Jacob Elordi ka zbuluar se ka kaluar një periudhë të vështirë fizike dhe emocionale para se të merrte rolin sfidues në filmin horror-sci-fi “Frankenstein”.
Gjatë xhirimeve të mini-serialit të Luftës së Dytë Botërore “The Narrow Road to the Deep North” për Prime Video, Elordi humbi ndjeshëm peshë dhe u përball me lodhje ekstreme.
“Zgjohesha në orën 3 të mëngjesit me trupin plot dhimbje,”tha ai për Los Angeles Times.
Por kjo gjendje, sipas tij, u shndërrua në një bekim për rolin e tij si Creature.
“E kuptova që ishte pikërisht ajo që më duhej për ‘Frankenstein’. Munda t’i artikuloja ato ndjenja të dhimbjes dhe vuajtjes.”
Aktori 28-vjeçar e përshkruan këtë periudhë si një krizë identiteti dhe kuptimi në karrierën e tij si aktor.
“Në atë moment, doja të fshihesha. Doja të largohesha për një kohë të gjatë dhe të rindërtoja mënyrën si e shikoja aktrimin,” tha Elordi. “Por kur erdhi ky rol, e kuptova që pikërisht aty duhej të ‘shkoja për t’u fshehur’. Maska e Creature ishte liria ime.”
Transformimi kërkonte një proces të lodhshëm grimi dhe përgatitje fizike.
“Ndihesha i çliruar në atë makeup. Nuk më duhej më të isha ky version i vetes,” shtoi Elordi. “Në ato gjashtë muaj, rindërtova veten. Dola nga ai film me një lëkurë të re.”
Përkrah tij, në film luajnë edhe Oscar Isaac si Dr. Victor Frankenstein dhe Mia Goth si e dashura e tij. Në kast përfshihen gjithashtu Christoph Waltz, Felix Kammerer, Lars Mikkelsen, Charles Dance dhe Ralph Ineson.
