Francia Raisa, 37 vjeç, ka reaguar për herë të parë ndaj thashethemeve se është në konflikt me këngëtaren Selena Gomez, të cilës i dhuroi një veshkë në vitin 2017.
Në një intervistë të fundit për emisionin Primer Impacto, Raisa mohoi zërat që ajo është e mërzitur me Gomez për shkak të sjelljes së saj pas transplantit, përfshirë pretendimet se Selena ka pirë duhan apo alkool.
“Pyetjet që po më bëni lidhen me thashetheme që kanë qarkulluar në media,” – tha ajo.
“Kur doli lajmi se isha e zemëruar sepse ajo po pinte duhan, unë as nuk isha në dijeni të këtij lajmi.”
Ajo shtoi se as ajo dhe as Gomez nuk kanë folur publikisht për këto pretendime dhe se gjithçka që po flitet është spekulim. “As unë, as ajo nuk kemi folur për këtë. Një ditë ndoshta do ta sqarojmë. Por për momentin, janë vetëm fjalë.”
Raisa mungoi në dasmën e bujshme të Gomez me producentin Benny Blanco, që u mbajt më 27 shtator në Santa Barbara, Kaliforni. Megjithatë, ajo u shpreh:
“Jam shumë e lumtur për të. Ka ndërtuar jetën e saj, është një miliardere. Jam mirënjohëse që munda ta ndihmoja me atë që bëra.”
Në vitin 2017, Gomez e falënderoi publikisht Raisa-n për dhurimin e veshkës duke e quajtur "motër" dhe "bekim". Por marrëdhënia e tyre u përfol si e tensionuar kur në një intervistë në 2022, Selena deklaroi se Taylor Swift ishte “mikesha e saj e vetme në industrinë e muzikës.”
Raisa reagoi me një koment të shkurtër në rrjete sociale: “Interesante”, të cilin më pas e fshiu. Në mars 2023, Gomez sërish e cilësoi Raisa-n si “shoqen më të mirë”, duke shtuar:
“Nuk do të jem kurrë më shumë në borxh me ndonjë njeri tjetër sesa me Francia-n.”
Babai i Raisa-s kishte deklaruar më parë se vajza e tij ishte përballur me Selena-n për shkak të përdorimit të alkoolit pas transplantit, por vetë aktorja e mohoi këtë.
“Ndonjëherë njerëzit duhet të qëndrojnë larg njëri-tjetrit për t’u rritur. Marrëdhëniet mund të jenë të vështira,” – u shpreh ajo në një intervistë për Extra TV.
