Dolly Parton, ka reaguar pas thirrjes së motrës së saj, Freida, që iu kërkoi ndjekësve të luteshin për këngëtaren, duke shkaktuar panik mes fansave për gjendjen e saj shëndetësore.
“Nuk kam vdekur ende!”, shkroi 79-vjeçarja në një video të publikuar të mërkurën në rrjetin X (ish-Twitter), duke sqaruar se ndonëse ka pasur disa probleme shëndetësore, gjendja e saj nuk është serioze.
“E di që shumë po mendojnë se jam më keq seç jam në të vërtetë,” u shpreh Parton në video. “A dukem e sëmurë? Jam duke punuar fort këtu!”
Këngëtarja e hitit Jolene theksoi se nuk e ka mbajtur veten pas vdekjes së bashkëshortit të saj, Carl Thomas Dean, çka e ka çuar të neglizhojë disa probleme shëndetësore.
“Kur ai ishte i sëmurë për një kohë të gjatë, unë nuk u kujdesa siç duhej për veten. I lashë pas dore disa gjëra që duhej t’i kisha trajtuar më herët,” tha ajo.
Sipas saj, shqetësimet që ka nuk janë "asgjë e madhe", por kërkojnë pushim dhe kujdes mjekësor.
Deklarata e Dolly-t vjen një ditë pasi Freida Parton, motra e saj, publikoi një status në Facebook, duke treguar se kishte kaluar natën duke u lutur për të.
“Shumë prej jush e dini se nuk është ndjerë mirë së fundmi. Ju lutem bashkohuni me mua në lutje për të,” shkroi ajo.
Më herët gjatë vitit, Dolly njoftoi se ka shtyrë rezidencën e saj në Las Vegas deri në shtator 2026, për shkak të disa procedurave mjekësore të domosdoshme.
“Ashtu siç i thashë doktorëve, ndoshta ka ardhur koha për kontrollin e 100,000 miljeve,” tha ajo me humor, duke shtuar se nuk është fjala për një vizitë tjetër te kirurgu plastik, por për trajtim serioz shëndetësor.
Gjithashtu, në qershor, ajo anuloi një paraqitje në parkun e saj tematik Dollywood, për shkak të një guri në veshkë që u shndërrua në infeksion.
