Jessie J ka ndarë një tjetër përditësim në lidhje me luftën e saj kundër kancerit të gjirit, duke bërë me dije se do të anulojë disa data koncertesh për shkak të një ndërhyrjeje të dytë kirurgjikale që e pret në fund të këtij viti.
“Fatkeqësisht, më duhet të bëj një operacion të dytë — jo shumë serioz, por i domosdoshëm para fundit të vitit,” deklaroi ajo për Entertainment Weekly. “Kjo ndërhyrje përkon me turneun që kisha planifikuar. Më vjen shumë keq, jam e zhgënjyer dhe e trishtuar, por duhet të shërohem.”
Jessie J iu drejtua edhe ndjekësve të saj në Instagram me një video emocionale ku sqaroi vendimin për të pezulluar aktivitetet artistike. “Disa prej jush e dinë që kam bërë një operacion për kancerin në gji tetë javë më parë,” tha ajo. “Po jetoj momentin, po përqafoj çdo ndjesi dhe po ec përpara me energjinë që kam.”
Këngëtarja shtoi se është në përpjekje për të riorganizuar datat e turneut për vitin 2026, ndërsa theksoi se do të ketë muzikë të re, por aktualisht nuk ka fuqinë e duhur për të performuar në skenë.
“Po mundohem të bëj më të mirën,” tha Jessie J. “Po përpiqem të ndaj dhe të menaxhoj çdo aspekt të jetës sime dhe të vendos energjinë aty ku duhet. Por mbi të gjitha, duhet të shërohem. Më falni.”
Jessie J bëri publike diagnozën e saj me kancer në gji më 3 qershor. Në rrjetet sociale, ajo tregoi se ishte diagnostikuar në fazë të hershme, përpara publikimit të këngës “No Secrets” në prill.
“Kam bërë analiza gjatë kësaj periudhe,” tregoi ajo në atë kohë. “E ndaj këtë me ju sepse më ndihmon dhe gjithashtu i ndihmon të tjerët që të ndajnë historitë e tyre me mua.”/Lapsi.al
