Reperja Cardi B është përballur këtë javë me një gjyq civil në Los Anxhelos, ku akuzohet për sulm dhe fyerje ndaj një roje sigurie në një klinikë mjekësore, ngjarje që dyshohet të ketë ndodhur në vitin 2018, kur ajo ishte shtatzënë katër muajsh.
Emani Ellis, roja e sigurisë që ka ngritur padinë, dëshmoi në gjykatë se artistja e hitit “WAP” e ka ofenduar rëndë, e ka pështyrë, i ka thënë fjalë me përmbajtje raciste dhe madje e ka lënduar në fytyrë me thonjtë e saj, duke i shkaktuar një prerje për të cilën më pas iu desh ndërhyrje kirurgjikale plastike.
Sipas dëshmisë së Ellis, ajo e kishte përshëndetur Cardi B në korridorin e klinikës dhe kishte përmendur emrin e saj, gjë që e kishte bërë reperen të reagojë ashpër, duke besuar se roja po përpiqej të zbulonte vizitën e saj private te mjeku. Ellis mohoi se kishte tentuar ta fotografonte Cardi B me telefonin e saj.
“Pasi dëgjoi që përmenda emrin e saj, ajo u kthye dhe më tha: ‘Pse dreqin po i tregon njerëzve që më ke parë këtu?’”, dëshmoi Ellis, sipas Law and Crime.
Ajo shtoi se kishte tentuar ta qetësonte Cardi B, por reperja kishte shpërthyer në fyerje dhe kërcënime, duke i thënë se do ta pushonte nga puna, e kishte turpëruar për trupin dhe e kishte quajtur me fjalë fyese raciste.
Ellis pretendon se Cardi B tentoi ta godiste, por nuk e qëlloi me grusht, megjithatë lëndimi në faqe nga thonjtë e saj ishte i mjaftueshëm për të kërkuar ndërhyrje mjekësore. Për këtë arsye, ajo ka ngritur padi për sulm dhe dhunë fizike.
Cardi B ishte e pranishme në sallën e gjyqit, e shoqëruar nga avokatët e saj, por nuk komentoi në lidhje me akuzat.
Ky nuk është incidenti i vetëm ligjor për Cardi B. Ajo është përballur më parë me akuza për dhunë, përfshirë një rast të vitit 2018 në një klub nate në Nju Jork dhe një tjetër në vitin 2023, kur goditi një fanse me mikrofon gjatë një koncerti në Las Vegas.
