Kris Jenner ka folur hapur për vendimin e saj për të "rifreskuar" facelift-in që kishte bërë para 15 vitesh. Në një intervistë të fundit për Vogue Arabia, Kris ndau detaje nga përmirësimi i fundit estetik.
“Bëra një facelift rreth 15 vite më parë, ndaj ishte koha për një rifreskim,” u shpreh Jenner. “E mora këtë vendim sepse dua të jem versioni më i mirë i vetes sime – dhe kjo më bën të lumtur.”
Jenner, e cila mbush 70 vjeç në nëntor, theksoi se për të, plakja me hijeshi nuk do të thotë të heqësh dorë nga vetja.
“Vetëm pse plakemi, nuk do të thotë që duhet të dorëzohemi. Nëse ndihesh mirë me lëkurën tënde dhe nuk do të bësh asgjë – atëherë mos bëj. Por për mua, ky është versioni im i plakjes me hijeshi.”
Spekulimet për ndërhyrje të reja nisën pasi Kris postoi disa foto në Instagram ku dallohej qartë ndryshimi i pamjes së saj. Ato u pasuan nga paraqitjet publike në Paris me Kim Kardashian gjatë gjyqit për grabitjen e vitit 2016, dhe në festën e beqarisë së Lauren Sánchez.
Revista PEOPLE më herët kishte konfirmuar se Jenner ishte trajtuar nga kirurgu plastik Dr. Steven Levine në New York, megjithatë vetëm tani ajo ka zbuluar se për çfarë ndërhyrjeje bëhej fjalë.
“Natyrisht, vajza ime Kylie ishte me mua gjatë operacionit, ndërsa Kim ishte prezente gjatë gjithë kohës përmes FaceTime,” – tha Jenner.
Kris Jenner nuk e ka fshehur kurrë faktin se ka kryer ndërhyrje estetike më parë. Në vitin 2011, ajo bëri facelift-in e parë me Dr. Garth Fisher, ndërsa më vonë ka folur për zmadhime gjoksi, Botox dhe madje edhe një reduktim të veshëve gjatë një episodi të Keeping Up with the Kardashians.
Në një postim në Instagram në qershor, ajo kujtoi përvojën e parë me facelift-in, duke shkruar:
“[Dr. Fisher] e bëri gjithçka një përvojë të mrekullueshme dhe madje na dha akses ta xhironim që të tjerët të mos kishin frikë nga procesi.”
E pyetur për ndjesinë që i jep hyrja në moshën 70-vjeçare, Kris tha: “Nuk e di si duhet të ndihet 70-a, por ndihem shkëlqyeshëm dhe jam e lumtur që po e përjetoj.”
