Reperi i njohur Lil Nas X, emri i vërtetë i të cilit është Montero Lamar Hill, është arrestuar të enjten në Los Anxhelos pasi u pa duke ecur në rrugë i veshur vetëm me të brendshme dhe çizme kauboji.
Sipas burimeve për The Post, artisti 26-vjeçar u ndalua nga policia rreth orës 5:50 të mëngjesit pasi qytetarët raportuan një person nudo në Ventura Boulevard.
Një zëdhënës i LAPD tha se i dyshuari “sulmoi oficerët” dhe u shoqërua menjëherë në spital për shkak të dyshimeve për mbidozë.
Në një video të publikuar nga TMZ, reperi shihet duke vendosur një kon portokalli mbi kokë ndërsa endej nëpër rrugë. Një dëshmitar që kaloi pranë tij dëgjoi Nas-in të thoshte se “po shkonte në një festë”.
Burime për NBC News thanë se gjatë konfrontimit, ai goditi një oficer dy herë në fytyrë. Pas trajtimit në spital, Lil Nas X u transferua në burgun e Van Nuys dhe u procedua për akuzën e “sulmit ndaj një oficeri të policisë”, një kundërvajtje që u regjistrua në orën 11:22 të paradites. Ai ndodhet ende pas hekurave, pa mundësi lirimi me kusht.
Vetëm disa orë para incidentit, fituesi i çmimit Grammy kishte ndarë disa postime shqetësuese në Instagram, ku tregonte shtëpinë dhe shkruante mesazhe enigmatike: “Dhe ja ku u kthye. Të gjithë kemi pritur kaq gjatë. Kur dreamworld kishte më shumë nevojë për të.”
Ky nuk është rasti i parë kur artisti flet hapur për problemet e tij emocionale. Në një intervistë për Variety në vitin 2020, ai kishte treguar se vdekja e gjyshes në vitin 2018 e kishte çuar drejt vetë-mjekimit dhe episodeve të ankthit.
