Zjarri i rënë në zonën e Drenovës në Mallakastër ka marrë përmasa alarmante, ndërsa situata është përkeqësuar ndjeshëm gjatë orëve të fundit. Dhjetëra forca zjarrfikëse nga Mallakastra, Fieri, Patosi, Albpetroli, bashkitë dhe efektivë të ushtrisë janë angazhuar në terren për të përballuar flakët që po përhapen me shpejtësi.
Pavarësisht ndërhyrjeve nga ajri, përfshirë përdorimin e helikopterëve, zjarri vijon të jetë jashtë kontrollit për shkak të erës së fortë, e cila ka favorizuar përhapjen e flakëve në një sipërfaqe të gjerë pyjore dhe kullotash.
Shërbimet e emergjencës po punojnë me intensitet për të shmangur afrimin e zjarrit drejt zonave të banuara, ndërsa rreziku për banesat mbetet real nëse situata nuk vihet nën kontroll në orët në vijim.
Autoritetet lokale kanë bërë thirrje për vigjilencë dhe bashkëpunim nga komuniteti, ndërsa nuk përjashtohet mundësia e evakuimit në rast se zjarri avancon më tej.
