Prokuroria e Posaçme Kundër Korrupsionit dhe Krimit të Organizuar (SPAK) ka përfunduar hetimet për një skemë të korrupsionit, mashtrimit dhe pastrimit të parave të zbuluar në tendera publikë të zhvilluar ndër vite në institucionet shtetërore.
Në qendër të hetimeve ndodhet Evis Berberi, ish-drejtori i Autoritetit Rrugor Shqiptar, i akuzuar për shkelje të rënda të ligjit, përfshirë korrupsion pasiv në gjashtë raste, shkelje të barazisë në tendera dhe pastrim parash në bashkëpunim.
Sipas SPAK, ai rezulton pronar de facto i kompanisë “DAAM” sh.p.k, pronësi që e kishte transferuar fiktivisht te persona të afërt për të shmangur lidhjet me tenderët publikë.
SPAK shpjegon se skema kriminale përfshinte manipulimin e të paktën tetë tenderëve shtetërorë në periudhën 2020–2022 me vlera që shkonin deri në qindra milionë lekë, si:
-Mbikëqyrja e punimeve për tunelin e Llogarasë (196 milionë lekë)
-Projektim i detajuar për kulla karikimi (62 milionë lekë)
-Rruga “Smart City” (82 milionë lekë)
-Studim fizibiliteti dhe supervizime rrugore
Përveç Berberit, mes të pandehurve janë edhe Valter Begaj, Ervis Lami, Brunilda Buli, si dhe përfaqësues të kompanive “DAAM” sh.p.k dhe “Net Group” sh.p.k, të dyja të akuzuara për korrupsion aktiv dhe pastrim parash në bashkëpunim.
Procesi tashmë i kalon gjykatës, e cila do të vendosë për përgjegjësitë penale të secilit prej të akuzuarve.
