Prokuroria e Posaçme ka përfunduar hetimet dhe ka dërguar për gjykim çështjen penale nr. 214/1 të vitit 2023, ku në qendër të akuzës ndodhet ish-drejtori i Autoritetit Rrugor Shqiptar dhe Agjencisë për Efiçencën e Energjisë, Evis Berberi. Ai akuzohet për katër vepra të rënda penale: shkelje e barazisë në tendera, korrupsion pasiv në gjashtë raste, pastrim parash në bashkëpunim dhe në mënyrë të përsëritur, si dhe përvetësim i paligjshëm përmes kontrollit të një kompanie private në konflikt interesi të pastër.
Sipas SPAK, Berberi rezulton të jetë pronar de facto i kompanisë “DAAM” sh.p.k., ndonëse ligjërisht ajo figuron në emër të tre personave të tjerë të pandehur (Valter Begaj, Ervis Lami dhe Brunilda Buli), të cilët raportonin dhe ekzekutonin urdhra financiarë të Berberit në mënyrë sistematike.
Hetimi zbuloi se përmes lidhjes së drejtpërdrejtë me kompaninë “Net Group” sh.p.k. të Valter Begajt, Evis Berberi manipuloi procedurat e tenderimit në shtatë raste të ndryshme, duke përfituar personalisht shuma të mëdha parash. Vetëm nga korrupsioni në favor të “Net Group”, Berberi mori rreth 77 milionë lekë në mënyrë të parregullt, të maskuara me fatura fiktive midis “Net Group” dhe “DAAM”.
Në shumë nga tenderat publikë, Berberi vepronte si titullar i institucionit kontraktor apo si kryetar i komisionit të vlerësimit të ofertave, duke përdorur pozicionin për të ndikuar drejtpërdrejt në përzgjedhjen e fituesve dhe për të ndarë përfitimet me bashkëpunëtorët e tij.
Ndërkohë, SPAK dokumenton se Berberi kontrollonte llogaritë bankare të “DAAM”, vendoste për pagat dhe licencat profesionale, përdorte të ardhurat për shpenzime personale dhe drejtonte investimet në pasuri të paluajtshme – të gjitha ndërkohë që mbante poste drejtuese publike.
Gjykata e Posaçme ka vendosur sekuestrimin e pasurive të kompanisë “DAAM”, përfshirë kuotat, disa prona të paluajtshme dhe automjete. Në banesën e Berberit janë gjetur dhe sekuestruar shuma të konsiderueshme në euro, paund dhe lekë, për të cilat SPAK dyshon se janë produkte të aktivitetit kriminal.
Në total, dosja përfshin 23 të pandehur fizikë dhe 2 juridikë, me një skemë të përpunuar ku bashkëpunimi midis zyrtarëve publikë dhe kompanive private synonte kontrollin dhe përfitimin sistematik nga fondet publike në sektorët e energjisë dhe infrastrukturës.
