Euro është zhvlerësuar ndjeshëm, këtë javë, duke arritur nivelet më të ulët në vitin 2025 kundrejt lekut. Sipas kursit zyrtar të këmbimit të Bankës së Shqipërisë, monedha europiane po këmbëhet 98 lekë dhe në raport me javën e kaluar ka humbur 0.5 pikë.
Ekspertët thonë se ka dy arsye, për të cilën është e vështirë të gjesh se kush ndikon më shumë ndër to.
Së pari është fluksi i pushueseve, i cili në fundjavë ishte i lartë, pas rritjes së shpejtë të temperaturave, dhe së dyti janë zgjedhjet, për të cilat historikisht në javën e fundit të fushatës, është parë zhvlerësim i shpejtë i monedhës europiane.
Në të dy rastet, edhe shpenzimi turistik dhe përdorimi i parave në fushatë e reflekton luhatjen në kurs.
Paralelisht, Leku është forcuar edhe ndaj valutave të tjera kryesore. Dollari Amerikan ka zbritur në nivelin e 86.6 lekëve ndërsa paundi britanik vlen 115 lekë.
Duke parë prirjen e kursit, një rënie e mëtejshme e Euros në muajt e ardhshëm do të jetë e vështirë të shmanget, pa ndërhyrjen e Bankës së Shqipërisë. /Euronews Albania
