Presidenti i SHBA-së, Donald Trump, ka pranuar se paqja midis Rusisë dhe Ukrainës, të cilën ai dikur e kishte premtuar se do ta arrinte shpejt, mund të mos jetë fare e mundshme.
“Ndoshta nuk është e mundur”, tha Trump, duke folur për NBC News. “Ekziston një urrejtje e jashtëzakonshme”, - shpjegoi ai duke shtuar se “po flasim për një urrejtje të jashtëzakonshme midis këtyre dy burrave” (Volodymyr Zelensky dhe Vladimir Putin, red.) dhe midis gjeneralëve. "Ata kanë luftuar fort për 3 vjet", - tha Trump, por shtoi se kishte ende "shanse shumë të mira për t'ia dalë".
“New York Times” shkruan ndërkohë se Kievi do të marrë më shumë ndihma kundër pushtimit rus. Bëhet fjalë për një sistem mbrojtës ajror “Patriot” që ka qenë i vendosur më parë në Izrael dhe që do të dërgohet në Ukrainë pasi të rinovohet. Gazeta ka cituar 4 zyrtarë aktualë dhe ish-zyrtarë amerikanë, duke shtuar se aleatët perëndimorë po diskutojnë logjistikën e një transferimi të mundshëm të një sistemi tjetër “Patriot” nga Gjermania ose Greqia.
Në krahun tjetër Vladimit Putin thotë se ka forca të mjaftueshme për të fituar pa përdorur armët bërthamore.
“Ne kemi forca dhe burime të mjaftueshme për ta çuar atë që filloi në vitin 2022 në një përfundim logjik, me rezultatin që i nevojitet Rusisë”, edhe pa përdorur armë bërthamore në Ukrainë” – tha Putin në një intervistë në televizionin “Rossiya1 TV”. Putin tha se është i bindur se pajtimi me popullin ukrainas do të arrihet.
“Mendoj se është e pashmangshme. Pavarësisht gjithë tragjedisë që po përjetojmë. Është çështje kohe”, - tha Putin. ©LAPSI.al
