Kanë dalë para pak çastesh rezultatet e para të sondazheve EXIT-POLL të raundit të parë të zgjedhjeve presidenciale në Rumani. Pas raundit të parë në nëntor të vitit të kaluar, Gjykata Kushtetuese anuloi raundin e dytë duke pretenduar se kandidati nacionalist pro-rus Calin Georgescu kishte marrë ndihmë të paligjshme nga jashtë nëpërmjet aplikacionit TikTok.
Për këtë shkak procesi u anulua dhe u vendos përsëritja e zgjedhjeve Pas përjashtimit të tij nga gara Calin Georgescu mbështeti kandidatin e së djathtës ekstreme George Simion. Është pikërisht ky i fundit që udhëheq në sondazhe me 30% të votave në këtë raund të parë. Ai ndiqet nga Crin Antonescu, përfaqësues i socialdemokratëve në qeverinë aktuale dhe Nicușor Dan, kryebashkiaku e Bukureshtit.
Ky i fundit u shpall kandidat i Partisë Liberale duke zëvendësuar Elena Lasconi që garoi në nëntor. Ajo është ende kandidate, por ka marrë vetëm 4% të votave. Do të jetë procesi i numërimit të votave për të parë se cili prej Antonescku apo Dan do të garojë në balotazh përballë nacionalistit Simion që duket se e ka siguruar raundin e dytë. Në një sondazh tjetër Crin Antonescu është në avantazh nga Nikusor Dan.
Nëse fitojnë, nacionalistët kanë paralajmëruar se do të tërheqin mbështetjen ushtarake të Rumanisë për Ukrainën, jetike për Kievin nga një vend kufitar, anëtar i NATO-s. Mbështetja për ta është në rritje pasi shihen si shpëtim mes rritjes së kostove të jetesës nga lufta në Ukrainë.
EXIT POLL
George Simion – 30%
Crin Antonescu – 23%
Nicușor Dan – 23%
Victor Ponta – 15%
Elena Lasconi – 4%
Kandidatë të tjerë – 5%
/Përgatiti LAPSI.AL
