Prokuroria e Posaçme ka dhënë pretencën për dosjen e njohur si 5D, që i përket fraksionit të dytë të hetimeve, ku ndër të pandehurat është edhe drejtoresha e Klubit Sportiv Tiranë, Deborah Keçi. SPAK ka kërkuar shpalljen fajtor të Keçit dhe dënimin e saj me 1 vit burg, si dhe heqjen e të drejtës për të ushtruar funksione publike për një periudhë 5-vjeçare.
Për tre të pandehurit e tjerë në këtë çështje, Teuta Guri, Reinaldo Gjerazi dhe Jetjon Meraj, Prokuroria e Posaçme ka kërkuar dënimin me 9 muaj burg secili. Megjithatë, për ta, SPAK ka propozuar pezullimin e dënimit dhe vendosjen në provë për një periudhë prej 2 vitesh.
Gjykata pritet të japë vendimin për këtë fraksion të dosjes 5D pas përfundimit të debateve mes palëve.
HETIMET E SPAK
Nga provat e mbledhura gjatë hetimeve, është provuar fakti se e pandehura Deborah Keçi, në cilësinë e titullarit të autoritetit kontraktor është dakortësuar me përfaqësuesin e operatorit ekonomik “V.A.S Konstruksion” sh.p.k për ta shpallur fitues të procedurës së prokurimit që në fazën e përgatitjes së dokumenteve, ende pa u shpallur procedura.
Të pandehurit Teuta Guri, Jetjon Mera dhe Rejnaldo Gjerazi, në cilësinë e anëtarëve të Komisionit të Vlerësimit të Ofertave, nuk kanë ushtruar në përputhje me ligjin detyrën e tyre për vlerësimin dhe klasifikimin e ofertave, por kanë vlerësuar dhe klasifikuar në kundërshtim me rregullat e prokurimit publik operatorin ekonomik “5D Konstruksion” sh.p.k, i cili ka qënë i paracaktuar për tu shpallur fitues nga e pandehura Deborah Keçi.
Gjithashtu nga veprimet hetimore të kryera gjatë hetimeve paraprake është provuar fakti se e pandehura Eglantina Zere, në cilësinë e titullarit të autoritetit kontraktor “Tirana Parking” institucion në varësi të Bashkisë Tiranë, në bashkëpunim me të pandehurit Enkelejda Qyta, Bruno Koçi dhe Rivjola Baxha, në cilësinë e anëtarëve të Komisionit të Vlerësimit të Ofertave (KVO), si dhe me të pandehurin Kristo Zhulati në cilësinë e anëtarit të Njësisë së Prokurimit kanë krijuar avantazhe dhe privilegje të padrejta për bashkimin e operatorëve ekonomik fitues “V.A.S Konstruksion sh.p.k” dhe “Rroku Guest” sh.p.k, në procedurën e prokurimit me objekt “Rikonstruksion i sheshit të parkimit te Selman Stermasi”, të zhvilluar në datën 01.10.2019.
