Pas gafës së ministres së tij Edona Bilali me “gjyshin” që çohej shtrati i vdekjes për të votuar në 11 maj për kandidaten e Shkodrës, një e dytë brenda ditës, pa kërkuar ndjesë do të ishte e rëndë për socialistët. Edona “e fshiu” videon ndërsa Rama nuk mund të tërhiqte dot mbrapsht fjalët e rënda se “ata që votojnë opozitën janë autikë politikisht”.
LEXO EDHE: Spoti skandaloz i kandidates së PS: Voto mua në 11 maj dhe pastaj vdis (VIDEO)
“Paguan lekët e dynjasë për Latifin. Më hidhen mua pse them gjysma e burrave janë çyrykë. Po ça të them? E them si metaforë, nuk është raport klinik. Për mua kush shkon në kënetë është gjysmak. Të zgjedhësh midis BE-së dhe kënetës, kënetën dmth nuk je mirë, politikisht je autik, s’je mirë”, - tha Rama gjatë një takimi me pensionistët në Gjirokastër.
Kjo deklaratë shkaktoi reagime të shumta në rrjetet sociale, për më tepër që fjala “autik” është hequr prej kohësh nga fjalori publik duke u zëvendësuar me “me aftësi ndryshe”.
Ndaj në mbrëmje vonë, në gjysmerrësirë Rama doli në Facebook për të kërkuar falje. U përpoq “të blejë” edhe komunitetin me “me aftësi ndryshe” duke u premtuar rritje të mbështetjes ndërsa nuk i kurseu etiketimet për ata që e konsideruan skandaloze deklaratën e tij. ©LAPSI.al
