Në një takim elektoral në Vorë, në kuadër të fushatës për zgjedhjet e 11 majit, Sali Berisha ka vijuar me retorikën e ashpër kundër asaj që ai e konsideron “krimi i organizuar i vënë në shërbim të pushtetit”, duke lëshuar paralajmërime të forta ndaj grupeve lokale të njohura si “të fortët e zonës”, konkretisht ndaj familjes Xhabafti.
Me premtimin për ndëshkim, Berisha akuzoi bandat që, sipas tij, kërcënojnë qytetarët për vota nën mbrojtjen e pushtetit lokal dhe qendror, duke i cilësuar si “terroristë” dhe duke u zotuar se do t’i shpallë organizatë terroriste sapo të marrë pushtetin.
“Ndaj dhe, të gjitha këto miliarda euro të zhdukura, do bëhet e pamundura për t’ua rigjetur dhe për t’ua rikthyer shqiptarëve. Këta banditë, dhe dëgjoni ju Xhabaftët, dëgjoni Xhabaftë këtu, dëgjoni këtu. Ju kriminelë, që nga banda e Erion Veliajt, shndërroheni në bandën e atij dhe këtij; mos kërcënoni qytetarët e Vorës, se unë ju jap fjalën e nderit, se vend mbi tokë nuk do të keni për terroristë, për terroristë,” deklaroi Berisha.
Ai akuzoi kryeministrin Edi Rama si mbështetës të drejtpërdrejtë të këtyre grupeve kriminale: “Ju keni mbështetjen e një delinkuenti që është kryeministër, keni mbështetjen e një njeri që s’ka ligj e as moral për karrigen e tij, dhe bëheni ushtarë të tij. Por ju garantoj se, te Erioni do shkoni dhe bashkë me ju, do vijë dhe Edi aty”.
Berisha shtoi se shpallja si organizatë terroriste e këtyre grupeve do të jetë akti i parë i qeverisë që ai premton të drejtojë pas zgjedhjeve: “Ju garantoj se javën e parë të qeverisë do të shpalleni organizatë terroriste dhe forca e ligjit, forca e shtetit do të jetë e pamëshirë ndaj jush.”
Duke përfunduar fjalën me tone edhe më të ashpra, Berisha e zgjeroi paralajmërimin përtej Vorës: “Ua them unë ju. Ju në Elbasan, Durrës, Shkodër, kudo që jeni, soji juaj do shpallet terrorist, mbajeni mend këtë.”
Deklarata vjen pas akuzave në rritje të opozitës për presion mbi votuesit dhe përdorimin e bandave lokale nga pushteti.
