Prokuroria pranë Gjykatës së Shkallës së Parë të Juridiksionit të Përgjithshëm Fier ka marrë të pandehur dhe ka dërguar për gjykim shtetasit P.P. dhe Sh.K., të akuzuar për kryerjen e veprës penale “Trafikimi i veprave të artit dhe kulturës”, parashikuar nga neni 138/a, pika 2 e Kodit Penal.
Hetimet janë zhvilluar në kuadër të procedimit penal nr. 1926 të vitit 2023. Sipas Prokurorisë, nëpërmjet metodave speciale të hetimit, është provuar se më datë 18 dhjetor 2023, i pandehuri P.P. ka kryer të gjitha veprimet për tregtimin e objekteve me vlerë të trashëgimisë kulturore, në drejtim të agjentëve nën mbulim, pa pasur licencën e kërkuar nga Ministria e Ekonomisë, Kulturës dhe Inovacionit, në kundërshtim me nenin 116 të ligjit nr. 27/2018, i ndryshuar.
Në këtë veprimtari të paligjshme, P.P. është ndihmuar nga shtetasi Sh.K.. Gjatë hetimeve, autoriteteve u janë vënë në dispozicion dhe janë sekuestruar pasuri kulturore materiale të luajtshme, konkretisht:
• Pushkë/revole, e shek. XVIII–XIX, e zbukuruar me motive floreale;
• Ikonë “Lindja e Krishtit”, që i përket fazës përmbyllëse të pikturës pasbizantine;
• Portret “Eros”, skulpturë mermeri e bardhë që paraqet kokën e një fëmije;
• Epitaf “Vajtimi i mbivarrshëm”, i realizuar me tekstil dhe metal, ku figurat e shenjtorëve janë të qëndisura me përpunim të hollësishëm.
Në përfundim të gjykimit, Gjykata e Fierit ka shpallur fajtorë të dy të pandehurit për akuzat e ngritura ndaj tyre.
Prokuroria shpreh angazhimin e saj për të vijuar me vendosmëri hetimet ndaj çdo individi apo grupi që cënon pasurinë kulturore dhe trashëgiminë kombëtare, duke theksuar rëndësinë e mbrojtjes së vlerave historike dhe artistike të vendit.
