Kreu i PD-së Sali Berisha ka denoncuar para grupit konservator të PPE-së në Këshillin e Europës se qeveria shqiptare ka instaluar pajisje DPI për të kontrolluar, sipas tij, internetin pikërisht në prag të zgjedhjeve. Berisha kërkoi mbështetje nga PPE në prag të 11 majit.
“Ne kemi zgjedhje. Vëzhgimi juaj është shumë i rëndësishëm. Tani, thashë diçka, por mediat janë 80%, më shumë se 80% të kontrolluara nga qeveria. Në fund, njësoj si Habibullah-u i Kabulit, ai (Rama) bllokoi TikTok-un.
Dhe tani ka instaluar pajisje DPI për të kontrolluar gjithashtu internetin. Kjo është e vërtetë. Kjo është e vërtetë! Sapo të rinjtë filluan ta kritikojnë në TikTok, ai e ndaloi dhe e bllokoi TikTok-un dy javë më parë. Ai bën gjithçka për të kufizuar komunikimin tonë me njerëzit", - tha Berisha.
Ai i mëshoi kësaj çështjeje edhe në një deklaratë që dha në fund të takimeve.
“Nuk ka diskutim që proceset politike janë procese tipike të diktaturave, dhe ky është vlerësimi. Nuk mund të ketë vlerësim tjetër. Në këtë aspekt sigurisht, unë garantova se ne jemi të përkushtuar në luftën ndaj krimit të organizuar me zero tolerancë, ndaj korrupsionit me zero tolerancë.
PËR MË SHUMË LEXO: Demokraci me DPI/ Interneti nën kontrollin e qeverisë para 11 Majit
Por kjo nuk do të thotë se, lufta kundër korrupsionit të përdoret për të mbuluar luftën kundër kundërshtarëve politikë, nuk do të thotë të përdoret kjo të vendosësh censurës, siç po vendos Edi Rama mbi mediat, mbi Tik Tok-un. Denoncova siç e dëgjuat edhe pajisjen DPI të kontrollit të internetit. Pra, praktikisht Shqipëria po degradon gjithnjë e më shumë në një shtet policor” – tha Berisha për gazetarët.
Berisha ka konfirmuar se deputetë të ndryshëm evropianë do të vijnë në Shqipëri dhe do të vëzhgojnë zgjedhjet e 11 majit. ©LAPSI.al
