Java e katërt e Bundesligës ofron gola dhe emocione, por lajmi është se Bayern frenon. Bavarezët dominojnë kundër Gladbach, por kalojnë në disavantazh dhe ndalen nga pritjet e Sommer: zvicerani kapitullon vetëm në minutën e 82-të, në 1-1 e shënuar nga Sané. Skuadra e Nagelsmann arrihet në renditje nga Union Berlin, i cili mposhti Schalke 04 me një rezultat të thellë 6-1. Dortmundi fiton 1-0 ndaj Herthës, buzëqeshin edhe Hoffenheim dhe Leipzig. Leverkusen ringjallet pas tre nokauteve: 3-0 ndaj Augsburg.
Borussia Mönchengladbach konfirmohet si macja e zezë e Bayernit të Nagelsmann, i cili nuk e kishte mundur dot asnjëherë vitin e kaluar dhe është ndalur në 1-1 edhe në Allianz Arena: Sommer vendimtar, me performancën për notën dhjetë. Start dominues i vendasve, që shkuan pranë golit pas më pak se një minutë: goditje me kokë e Pavard dhe një pritje e shkëlqyer e zviceranit Sommer që shmangu disavantazhin e menjëhershëm. Bayern shtyu përpara dhe e vuri në vështirësi Gladbach, por goli nuk erdhi: Kimmich ishte i rrezikshëm nga goditja e dënimit, ndërsa pak minuta më vonë Sané provoi silurën fluturimthi, që përfundoi lart mbi traversë. Fundi i pjesës së parë është i gjithi i Mané, që pa ti anulohen dy gola për pozicion jashtë loje. Bayern shkoi sërish afër golit me Davies, por në minutën e 43-të erdhi avantazhi befasues i Gladbach: çmenduri e Upamecanos, i cili në fakt e nisi Thuram të vetëm në gjysmën kundërshtare, duke i dhënë mundësinë të zhvendosë Neuerin dhe ta dërgojë topin në rrjetë.
Në pushim shkohet 1-0 për miqtë dhe në pjesën e dytë bavarezët u hodhën përpara me dëshpërim. Müller ishte menjëherë i rrezikshëm, por Mané kishte mundësinë më të mirë, duke e detyruar Sommer të bëjë një pritje të jashtëzakonshme të dyfishtë në minutën e 60-të. Portieri zviceran ishte në super formë dhe u tregua vendimtar edhe ndaj Sané, ndaj Nagelsmann vendosi të ndryshojë diçka duke futur Musialan dhe Gnabry. Gladbach nuk sulmonte më dhe ofensiva e Bayern vazhdoi deri në fund: Sommer shpëtoi rezultatin edhe ndaj Gnabry dhe në goditjen e shkëlqyer të Pavard nga distanca. Kimmich goditi shtyllën direkt nga këndi e ishte një monolog i Bayernit me portierin, që u detyrua të dorëzohet në minutën e 82-të: goditja e Sanè në zonë ishte e pandalshme për përfundimtaren 1-1. Bavarezët mund edhe të fitonin, por Sommer shpëton sërish Gladbach me pritjet decizive ndaj Davies dhe de Ligt, i cili e mbylli ndeshjen si qendërsulmues. Përfundoi 1-1 në Allianz Arena: Sommer bllokoi Bayernin, që arrihet në 10 pikë nga Union Berlin: një dyshe e çuditshme kryeson Bundesligën.
Bundesliga Germany
Hertha Berlin 0-1 Borussia Dortmund
Hoffenheim 1-0 Augsburg
Mainz 0-3 Bayer Leverkusen
RB Leipzig 2-0 Wolfsburg
Schalke 04 1-6 Union Berlin
Bayern Munich 1-1 Borussia Monchengladbach
