Në anën tjetër, Chevrolet i kuq me një shirit të zi që prej tre ditësh lëvizte rregullisht në Gramsh, ishte lehtësisht i dallueshëm.
Aldo Bici dhe Ardian Caka ishin dy ushtarët me shërbim pasditen e së shtunës. Rreth orës 17:00 dalluan brenda ambjenteve të uzinës, një person që fotografonte objektin. Ndërhynë menjëherë dhe i bënë thirrje të ndalej.
Në uzinë kishte hyrë Mikhail Zorin. Ai kishte kaluar muret e objektit dhe po fotografonte. Jashtë e priste Svetlana Timofoeva, 33 vjeç dhe një person tjetër me nënshtetësi ukrainase, për të cilin dihen vetëm inicialet A.T.
Në momentin që ushtarët iu afruan, Zorin u hodhi lëndë djegëse në fytyrë. Lënda shkakton djegie të syve dhe mpirje të fytyrës, por pavarësisht kësaj ushtarët e kanë mbajtur me forcë brenda në uzinë. Zorin u shoqërua në komisariatin e Gramshit.
Policia është njoftuar se jashtë uzinës kanë qenë edhe Svetlana Timofoeva, 33 vjeçe dhe 25-vjeçari me inicialet A.T. Këta janë përpjekur të largohen, por janë arrestuar në të dalë të Gramshit.
Lajmi për arrestimin e tre rusëve në një situatë të mbarsur nga lufta në Ukrainë dhe tensionet në Ballkan ka ngjallur kuriozitet dhe panik.
Përveç mediave në Tiranë, u raportua menjëherë nga Reuters dhe Moscoë Times. Fabula që dyshohet është ajo e spiunazhit, e kamufluar nën vellon e turizmit dhe pasionit për fotografinë.
Uzina e armëve në Gramsh është e vjetër. E ngjashme objektet e tjera të lëna pas dore, por të ndërtuara gjatë Luftës së Ftohtë.
Por objekti ruhet nga forcat ushtarake, megjithëse prej tre vitesh nuk është funksional. Në hyrje, tabela lexon qartë: Ndal! Zonë ushtarake!
Është lehtësisht e kuptueshme, që hyrja në objekt është e ndaluar. Të arrestuarit e kanë pasur të qartë se po shkelnin ligjin.
Pavarësisht kësaj, një prej tyre ka kapërcyer murin për të fotografuar çfarë kishte brenda. Pajisja me lëndë djegëse dhe përdorimi kundër ushtarëve e rëndon pozicionin e të arrestuarve. Alibia se rusët e arrestuar janë thjesht blogerë të apasionuar fut ujë.
Dyshimet se pasioni për fotot është thjesht kamuflim, i konfirmoi edhe kryeministri Rama që i quajti të arrestuarit “tre individë të dyshuar për spiunazh”. Por rusët i thanë policisë se ishin fotografë dhe kishin një faqe blog, ku reklamonin kryesisht foto dhe video të ish-bazave ushtarake të Bashkimit Sovjetik. Ata kanë thënë se fotografonin kryesisht territore ushtarake që janë të braktisura dhe nuk përdoreshin më nga shteti. Blogu i rusëve të arrestuar ka mes të tjerash edhe foto të ambjenteve të vjetra të objekteve ushtarake. Një prej tyre është bërë edhe në Shqipëri.Çfarë trishtimi që edhe kur bëhet fjalë për një ngjarje kaq delikate sa ajo e Gramshit, gjithëfarë gjelash laramanë ia marrin avazit majë plehut të interesave të tyre mizerabël! Po edhe çfarë krenarie për rojet ushtarake që i neutralizuan tre individët e dyshuar për spiunazh!
— Edi Rama (@ediramaal) August 20, 2022
Në këtë foto të publikuar nga Cianidum, duke se një prej të arrestuarve ka qenë më herët edhe në bazën e Pashalimanit, të cilën e përshkruan në këtë formë: “Bunkeri i nëndetëseve është vendi nëntokësor më i famshëm në Shqipëri, një nga monumentet më të mëdhenj të Luftës së Ftohtë në këtë vend. Është një tunel i drejtpërdrejtë në mal me një numër të madh shërbimesh të ndryshme, si dhe një qendër komandimi të veçantë. Nga aksesi, vendi është pothuajse turistik, ecja përreth është shumë interesante”.View this post on Instagram
Mëngjesin e të dielës, gjendja shëndetësore e dy ushtarëve të uzinës së Gramshit ishte e stabilizuar. Ministri i Mbrojtjes, Niko Peleshi tha se ngjarja “nuk mund të kalojë si një incident civil. Por nuk mund të nxitohemi dhe të nxjerrim konkluzione”.
Më herët, Ministria e Mbrojtjes e kishte quajtur këtë “një incident”, por kreu i Partisë Demokratike, Sali Berisha e dënoi këtë emërtim, duke e quajtur një “akt agresioni terrorist të zbuluesve rus ndaj rojeve të Uzinës Ushtarake të Gramshit”.
Tre të arrestuarit janë ende në qeli. Për verifikimin dhe marrjen e tyre në pyetje janë angazhuar Departamenti i Policisë Kriminale dhe Drejtoria e Antiterrorit në Policinë e Shtetit./Lapsi.al
