Andi Bushati:Karvani me oligarkë kundër Albin Kurtit
Në këtë pikë Albin Kurti nuk qe në gjendje as të thoshte publikisht arsyen që nuk e pranonte këtë propozim. Ai dukej i frustruar dhe plot ngërç, sikur kishte frikë se mos thyente diçka të parikuperueshme. "Ndoshta Albini ka pasur ankthin se duke hyrë në replika me Ramën, jepte imazhin e atij që po prish marrëdhëniet me Shqipërinë, që ka qenë për vite të tëra kartvizita më e fortë politike për të" tha për Lapsi.al një burim pranë Vetëvendosjes. Por edhe ky shpjegim nuk duket shterues, për sa kohë që më parë Kurti nuk ka nguruar të mbante qëndrime të forta. Ndoshta çelësi i kësaj stepje duhet gjetur në kulisat e axhendës që vendos paraprakisht protokolli. Një gjë ishte e qartë, se gjatë takimit dy palësh në Prishtinë, stafet e dy qeverive kanë rënë dakord që të mos nxjerrin në pah asnjë nga mosmarrveshjet mes tyre. Natyrisht dhe të dy kryeministrat kanë qenë OK me këtë qasje. Por me këtë kompromis të kryer, fitorja medoemos do anonte nga Rama, i cili është dhe politikani që di të shtiret mjeshtërisht dhe di të aktrojë më mirë. Kryeministri nga Tirana nuk e kishte problem të pohonte se "Ballkani i hapur" nuk i ndan të dy vendet, kur një gjë të tillë e di dhe bufi se nuk është e vërtetë. Ai nuk kishte pikë sikleti, të tregonte miqësinë me Albinin, madje edhe të qeshurat mes tyre, kur shumëkush është i ndërgjegjshëm për betejën nën rrogoz mes tyre. Ai nuk e kishte problem ta kalonte me të qeshur raportin që ruan me Vuçiçin, ndërkohë që e di mirë se kjo acaron jo pak vetë në Prishtinë. Përballë kësaj hipokrizie Albin Kurtit i duhej të dëgjonte dhe të bënte sikur besonte pa reaguar. Prandaj ai e humbi betejën në publik. Për faktin se Rama këtë herë zgjodhi të ishte vetvetja: gënjeshtar dhe manipulator, ndërsa Kurti doli nga vetja duke u përmbajtur si rrallë herë për të mos i thënë ato që mendon realisht. Pikërisht kjo solli ngadhënjimin e njërit dhe frustrimin e tjetrit. ©Lapsi.al
