Ditën që qeveria bekoi rritjen e çmimit të naftës në nivele rekord, me 165 lekë për litër, kryeministri Rama hodhi një shashkë për konsum publik që nuk kalon dot pa tërhequr vëmëndjen.
Ai premtoi të sjellë në Shqipëri garat e Formula 1 gjatë panairit të makinave “Automotive Fair Albania”.
“Askujt nuk ja kishte marrë mendja se do të kishim në Tiranë një finale evropiane në futboll dhe e patëm. Po kështu besoj se nuk kemi pse të trembemi nga një ëndërr si kjo e sjelljes së garave automobilistike në Shqipëri dhe të arritjes deri te një garë e Formulës 1, në një pistë me të gjitha standardet” ishte deklarata që bëri menjëherë xhiron e portaleve.
Duket absurde se si në kulmin e krizës së çmimeve, kryeministri nuk mendon si të zbusë varfërinë, por e ka mendjen te garat me makina, tek luksi i Formula 1.
Që nuk e beson njeri që Rama e ka seriozisht, kjo është e pak por e sigurtë.
Broçkulla si këto janë lëshuar edhe më parë për të trullosur mendjet e popullsisë më të varfër në Europë.
Lajthitje e rrallë ishte ajo e fushatës zgjedhore vitin e kaluar, kur Rama kërkonte votat për mandatin e tretë dhe premtonte një fabrikë vaksinash në Shqipëri. Duke njohur mirë frikën që kishte mbjellë nga Corona, ai e përshkroi atë pa u skuqur, si një fabrikë me teknologji moderne.
“Kemi nisur bisedat për të sjellë në Shqipëri fabrikën e prodhimit të vaksinave. Një fabrikë e teknologjisë së lartë, e cila aktualisht është një ndër kompanitë më të mëdha farmaceutike në botë, kompania farmaceutike që bën distribucionin e vaksinës Sinovac, por që në të njëjtën kohë është prodhuese e shumë vaksinave dhe produkteve të tjera farmaceutike” ishin fjalët që tha pas një vizite në Turqi.
Po me kaq paturpësi u artikulua edhe ideja për të dërguar dy satelitë në hapësirë me emrat Albania 1 dhe Albania 2 gjatë tetorit të vitit të kaluar.
Në një video që publikoi në rrjetet sociale, Rama fliste me një person tjetër në anglisht që i premtonte se satelitët do të ishin gati në mars të këtij viti. Kanë kaluar disa muaj dhe kjo e satelitëve mbetet një ide e paqartë për nga kostot, apo funksionin e tyre.
Janë të paktë ata që premtime të tilla i marrin seriozisht. Në përgjithësi, ato shoqërohen nga meme dhe ironi në mediat sociale, të cilat prezantojnë një klloun për kryeministër.
Në fakt, ky mund të jetë edhe qëllimi i mesazhit që përçon tek qytetarët. Në momentin që ka marrë përsipër përgjegjësinë për rritjen e çmimit të naftës dhe produkteve ushqimore, talljet dhe ironitë e njerëzve përtypen më lehtë se mllefi dhe irritimi i qytetarëve./Lapsi.al
